दमौली– तनहुँको शुक्लागण्डकी नगरपालिकाले चालु आर्थिक वर्ष ०७५/७६ को चार मिहनामै वार्षिक लक्ष्यभन्दा बढी राजश्व संकलन गरेको छ । 

नगरपालिकाले चालु आवमा ५ करोड ४ लाख १३ हजार राजश्व संकलन गर्ने लक्ष्य राखेकोमा चार महिनाको अवधिमा ८ करोडभन्दा बढी राजश्व संकलन गरेको हो । नगरपालिकाले मङ्सिरको मध्यसम्म ८ करोड ३४ लाख ९७ हजार ७ सय ७८ रुपैयाँ राजश्व संकलन गरेको उपप्रमुख सविता रसाइलीले जनाइन् । 

उनका अनुसार आन्तरिक उत्पादन करबाट ३ करोड ६७ लाख ५४ हजार ५ सय, ढुंगा, गिट्टी, बालुवा उत्खनन तथा बिक्री ठेक्काबाट २ करोड ६७ लाख ८६ हजार, नवीकरण, सम्पत्ति मूल्यांकन, नाता प्रमाणित, व्यक्तिगत घटना दस्तुर, विद्युत् सिफारिसलगायतबाट १ करोड २१ लाख संकलन भएको छ । 

स्थानीय तहको निर्वाचनपछिको पहिलो वर्ष लक्ष्यभन्दा कम राजश्व संकलन गरेको नगरपालिकाले चालु आवमा भने लक्ष्यभन्दा बढी राजश्व संकलन गर्न सफल भएको रसाइलीले बताइन् । उनी भन्छिन्, ‘गत आवमा हामीलाई कम अनुभव भएका कारण लक्ष्यअनुसार राजश्व संकलन गर्न सकेनौँ ।’  

नगरपालिकाले गत आवमा ६ करोड राजश्व संकलन गर्ने लक्ष्य राखेकोमा चार करोड मात्रै संकलन भएको थियो ।