नेपाली कांग्रेसका सांसद गगन थापाले एमसिसी सम्झौतालाई राष्ट्रघाती भन्दै गर्दा आफैंतिर औँला फर्काउनुपर्ने बताएका छन । उनले माओवादी केन्द्रका सांसद गिरिराजमणि पोखरेलले ‘राष्ट्रघाती’ सम्झौता भनेकोमा आपत्ति जनाए । 

एमसिसी सम्झौतामाथिको सैद्धान्तिक छलफलमा भाग लिँदै थापाले भने,‘म नाम लिन चाहन्न थें तर नाम लिनुपर्छ । माननीय गिरिराजमणि पोखरेलले यहाँ उभिएर यो सम्झौता राष्ट्रघाती भन्नुभयो । तर २०७४ साल साउन १९ गतेको क्याबिनेटको उपस्थिति पल्टाएर हेरौं, त्यतिबेला माननीय पोखरेल सोही क्याबिनेटको मन्त्री हुनुहुन्थ्यो ।’

आफैंतिर औँला फर्काउनुपर्ने भन्दै थापाले भने, ‘आज राष्ट्रघाती भन्दै गर्दा आज औँला आफैंतिर फर्काउनुपर्छ । धेरै झुट नबोलौँ । हामीले यहाँ आएर संविधानभन्दा माथि हुन्छ भनिदिएका छौं । हावादारी गफ गर्ने ? नेपालको संविधानभन्दा माथि केही हुन्छ ?’

उनले भनेका छन, ‘अनि नेपालको कानुनसँग सन्धीमा भएको कुरा बाझियो भने त्यही सन्धी लागु हुन्छ भन्ने कुरा यही संसदबाट कतिवटा पारित गरिसकेका छौं ।’