युक्रेनमा रुसी आक्रमणको आज छैटौं दिन हो । अहिलेसम्म के भयो थाहा दिनुहोस् ?

युक्रेनको दोस्रो ठूलो सहर खार्किभमा रुसले गरेको आक्रमणपछि भीषण विस्फोट हुँदा १० जनाको मृत्यु भएको छ । जसमा २० जना घाइते भएका छन् । क्षेत्रीय सरकारको मुख्यालयमा रुसले मिसाइल प्रहार गरेको हो ।

समाचार एजेन्सी रोयटर्सका अनुसार दोस्रो चरणको वार्ताका लागि युक्रेन र रुसका प्रतिनिधिमण्डलले भोलि फेरि भेट गर्नेछन् ।

युक्रेनका राष्ट्रपति भोलोडिमिर जेलेन्स्कीले यो आक्रमणलाई एउटा देशको आतंककारी कार्य भनेका छन् । उनले यी आक्रमणहरूमार्फत रुसले युद्ध अपराध गरिरहेको बताए । रुसले आवासीय क्षेत्र र सर्वसाधारणमाथि आक्रमण गरिरहेको उनको भनाइ छ । मारिएका सर्वसाधारणमा १६ बालबालिका पनि थिए ।

युरोपेली संघ संसदको विशेष सत्रलाई सम्बोधन गर्दै युक्रेनका राष्ट्रपतिले आफ्नो देशलाई ईयूको सदस्यता दिन माग गरे । यसले युक्रेनलाई थप बलियो बनाउने उनको भनाइ छ ।

युक्रेनको उत्तरपूर्वी सहर ओख्ट्रियामा रुसले गरेको आक्रमणमा परी ७० युक्रेनी सैनिकको मृत्यु भएको बताइएको छ । यसैबीच, रुसी सशस्त्र गाडीहरूको ठूलो लस्कर युक्रेनको राजधानी किवतर्फ गइरहेको अन्तर्राष्ट्रिय सञ्चार माध्यमले बताएका छन् ।

रुसी विदेश मन्त्री सर्गेई लाभरोभले आफ्नो देशको आक्रमणलाई जायज ठहर गर्दै युक्रेनले अब आणविक हतियार प्राप्त गर्न बन्द गर्नुपर्ने बताएका छन् । संयुक्त राष्ट्र संघको सम्मेलनमा उनले यस्तो बताएका हुन् ।

बेलायती प्रधानमन्त्री बोरिस जोनसनले रुसले युक्रेनमाथि ‘बरबर र अन्धविश्वासपूर्ण’ आक्रमण गरिरहेको बताएका छन् । उनले रुसमाथि थप कडा प्रतिबन्ध लगाउन आफू तयार रहेको बताए ।

रुसी रक्षा मन्त्रालयले युक्रेनको राजधानी किव निश्चित क्षेत्रहरूलाई लक्षित गर्दै आक्रमण गर्ने चेतावनी दिएको छ।

मंगलबार दिउँसो जारी गरिएको विज्ञप्तिमा रुसी अधिकारीहरूले आफ्ना सेनाहरूले युक्रेनी सुरक्षा सेवाको प्राविधिक केन्द्र र अन्य स्थानहरूमा आक्रमण गर्न लागेको बताएका छन् ।

विज्ञप्तिमा युक्रेनका नागरिकलाई आफ्नो घर छाड्न पनि भनिएको छ । अधिकारीहरूले यी आक्रमणहरूको उद्देश्य रुस विरुद्धको 'सूचना आक्रमण' रोक्नु रहेको दाबी गरेका छन् ।

एक सैन्य विज्ञले रुसको ७५ प्रतिशत सेना युक्रेनविरुद्धको लडाइँका लागि पठाएको दाबी गरेका छन् ।

रोयल युनाइटेड सर्भिस इन्स्टिच्युटका ल्याण्ड वारफेयर र मिलिटरी साइन्सेसका अनुसन्धानकर्ता ज्याक वाटलिङले यो जानकारी दिएका हुन् । एक वरिष्ठ अमेरिकी रक्षा अधिकारीले पनि यस्तै संख्यामा रुसले सेना पठाइएको उल्लेख गरेका छन् ।

रुसको आक्रमणपछि युक्रेनबाट हालसम्म ६ लाख ६० हजारभन्दा बढी मानिस विस्थापित भएका छन् । संयुक्त राष्ट्र शरणार्थी एजेन्सीले यहाँबाट पलायन हुनेमा अधिकांश महिला र बालबालिका रहेको जनाएको छ ।

एजेन्सीका प्रवक्ता साबिया मान्टुले स्विट्जरल्याण्डमा एक ब्रीफिङका क्रममा पोल्याण्ड प्रवेश गर्न मानिसहरूले ६० घण्टासम्म पर्खिरहेको रिपोर्ट आएको बताइन् । 

संयुक्त राष्ट्र मानव अधिकार आयोगले युक्रेनमा फेब्रुअरी २४ देखि सोमबार मध्यरातसम्म ५३६ नागरिक मारिएको जनाएको छ । आयोगका प्रवक्ता लिज थ्रोसेलले १३ बालबालिकासहित १३६ सर्वसाधारण मारिएको बताए । उनले आयोगलाई युक्रेनमा २६ बालबालिकासहित ४ सय सर्वसाधारण घाइते भएको रिपोर्ट प्राप्त भएको बताए ।

युक्रेनी सैन्य अधिकारीले पहिलो पाँच दिनमा ५ हजार ७१० रुसी सैनिक मारिएको दाबी गरेका छन् । फेसबुकमा जारी गरिएको भिडियो सन्देशमा सेनाका प्रवक्ताले युक्रेनी सेनाले २०० भन्दा बढी रुसी सैनिकलाई बन्दी बनाएको पनि दाबी गरेका छन् । अधिकारीले १९८ रुसी ट्याङ्क, २९ विमान, ८४६ बख्तरबंद गाडी र २९ हेलिकप्टर पनि ध्वस्त भएको दाबी गरेका छन् ।

भारतले युक्रेनमा एक भारतीय विद्यार्थीको मृत्यु भएको पुष्टि गरेको छ । भारतीय विदेश मन्त्रालयका प्रवक्ता अरिन्दम बागचीले ट्विटमा लेखेका छन्– गहिरो दुःखका साथ खार्किभमा भएको गोलाबारीमा एक भारतीय विद्यार्थीको मृत्यु भएको पुष्टि गर्दैछौँ ।'