एमसिसीविरुद्ध विभिन्न ६ वामपार्टी र दुई मोर्चाका साथ संघर्षमा उत्रिएको नेपाल कम्युनिस्ट पार्टी (नेकपा)का महासचिव नेत्रविक्रम चन्द ‘विप्लव’ले राजनीतिक सक्रियता बढाएका छन् । गत आइतबार प्रतिनिधिसभाले अमेरिको सहयोग सम्झौता मिलेनियम च्यालेन्ज कर्पोरेसन (एमसिसी)लाई व्याख्यात्मक घोषणासहित पारित गरेपछि विप्लवले सक्रियता बढाएका हुन् । 

जनस्तरमा व्यापक चासो रहेको र विरोध भइरहेको एमसिसीलाई संसदले अनुमोदन गरेसँगै विप्लवलगायतले विरोधी धारको नेतृत्व गरिरहेका छन् । एमसिसी राष्ट्रघाती रहेको भन्दै संसदमा टेबल गर्नुअघिबाटै आन्दोनमा उत्रिएको वाम पार्टीहरुको समूहले आन्दोलनलाई प्रभावकारी बनाउन पहल थालेको छ । 

सत्तारुढ दलहरुबीच लामो रस्साकस्सीका बीच गठबन्धन जोगाउने गरी व्याख्यात्मक घोषणाको सहारा लिइएको भए पनि नेकपा माओवादी केन्द्र र एकीकृत समाजवादीमा असन्तुष्टि बढेको छ । माओ‌वादी केन्द्रमा नेता नारायणकाजी श्रेष्ठ पक्षले र एकीकृत समाजवादीमा सम्मानित नेता झलनाथ खनालले विरोध गरिरहेका छन् । 

त्यस्तै, एमसिसी पारित गर्ने समयमा बेल घेरेर बसेको नेकपा एमालेका नेता भीम रावल पनि एमसिसीको विपक्षमा उभिएका छन् । यस्तोमा नेकपाका महासचिव विप्लवले आफ्नो सक्रियता बढाएका छन् । 

उनले नेकपा माओवादी केन्द्रका नेता नारायणकाजी श्रेष्ठ, नेकपा एकीकृत समाजवादीका सम्मानित नेता झलनाथ खनाल र एमसिसी सम्झौताको संसदमा चर्को विरोध गर्दै आएको नेपाल मजदुर किसान पार्टीका अध्यक्ष नारायणमान बिजुक्छेसँग भेटवार्ता र छलफल गरेका छन् । 

विप्लवले एमसिसीविरोधी नेताहरुलाई आफूहरुको समूहले आयोजना गर्न लागेको एमसिसीविरुद्धको सभामा सहभागी गराउन पहल गरिरहेको जनाइएको छ । नेताहरुसँगको भेटमा विप्लवले राजनीतिक सहकार्यको प्रस्ताव गरिरहेका छन् ।