रुसले युक्रेनमा आक्रमण सुरु गरेयता २० लाख मानिसले देश छाडेका छन् । शरणार्थीका लागि संयुक्त राष्ट्रसंघीय उच्चायुक्त फिलिपो ग्रान्डीले द्वन्द्व सुरु भएयता हालसम्म २० लाखले युक्रेन छाडेको बताए । 

रुसले युक्रेनमा १३ दिनअघि आक्रमण सुरु गरेको थियो । यो दोस्रो विश्वयुद्ध पछिको सबैभन्दा ठूलो शरणार्थी संकट भएको बताइएको छ । ग्रान्डीले युक्रेनबाट सुरुमा आएका मानिसहरू धनी भएको बताए, किन भने तिनीहरूमध्ये धेरै कारहरूमा आएका थिए ।

'ती मानिसहरूको युक्रेन बाहिर सम्पर्क थियो । तिनीहरू आफ्नो परिवार, साथीहरू र समुदायहरूमा गएका छन्,' उनले भने । तर, उनले यदि युद्ध जारी रहे स्रोत अभाव भएका मानिसले पनि युक्रेन छाड्ने उनले बताए ।

उनले थपे, 'यो युरोपेली देशहरूका लागि जटिल मुद्दा बन्ने छ । यस विषयमा सबै युरोप एकजुट हुनुपर्छ । यस्तो समस्या अन्य देशमा भए पनि  दोस्रो विश्वयुद्धपछि युरोपले त्यस्तो संकटको सामना गरेको थिएन ।'

पोल्याण्डका उपविदेश मन्त्री पावेल जाब्लोन्स्कीले पोल्साट न्यूजलाई शरणार्थी संकटसँग लड्न ईयूलाई ५० करोड युरो आवश्यक पर्ने बताएका छन् । करिब १२ लाख मानिस युक्रेन छोडेर पोल्याण्ड पुगेको अन्तर्राष्ट्रिय सञ्चारमाध्यमले जनाएका छन् ।