भौतिक पूर्वाधार तथा यातायातमन्त्री रेणुकुमारी यादवले महिलालाई प्रतिनिधिसभामा सिट आरक्षण गरिनुपर्ने बताएकी छन् ।
मंगलबार ११२ औँ अन्तर्राष्ट्रिय महिला दिवसको अवसरमा आयोजित ‘महिलाको राजनीतिक सहभागिता : चुनौती र अगाडिको बाटो’ विषयक अन्तरक्रियामा बोल्दै मन्त्री यादवले महिलाको राजनीतिक सहभागिता वृद्धि गर्नका लागि प्रतिनिधिसभा निर्वाचनमा आरक्षण सिटको व्यवस्था गर्नुपर्ने बताएकी हुन् ।
उनले महिलाले राजनीतिमा गरेको योगदानको उचित मूल्यांकन हुनुपर्ने पनि बताइन् ।
मन्त्री यादवले महिलालाई राजनीतिक प्रतिस्पर्धामा ल्याउन नसके उनीहरूको क्षमता अभिवृद्धि हुन नसक्ने बताइन् ।
नेकपा (एमाले) की उपाध्यक्ष अष्टलक्ष्मी शाक्यले राजनीतिक पार्टीले महिलालाई अगाडि बढाउने योजना बनाउनुपर्ने बताइन् ।
उनले हाल स्थानीय तहमा उपप्रमुखको भूमिकामा रहेका महिला अब उपप्रमुखमै सीमित हुनु नहुने बताइन् ।
मेहनत र स्वअध्ययनले आफ्नो क्षमता वृद्धि गर्दै अघि बढ्नुपर्नेमा उनले जोड दिइन् ।
पितृसत्ताले महिलालाई कमजोर बनाएको भन्दै उपाध्यक्ष शाक्यले त्यसका विरुद्ध वैचारिक संघर्ष गर्न महिलालाई आह्वान गरिन् ।
स्थानीय तहमा ३३ प्रतिशत महिलाको सहभागिता सुनिश्चित गर्न पार्टीले स्पष्ट मापदण्ड बनाउनुपर्ने उनले बताइन् ।
नेकपा (एमाले) की स्थायी कमिटी सदस्य बिन्दा पाण्डेले पछिल्लो पुस्ताका महिला राजनीतिक रूपमा नेतृत्व लिन सक्षम र योग्य भएको बताइन् ।
धेरै महिला स्थानीय तहको प्रमुख चलाउन योग्य भएको भए पनि जसले प्रमुख दाबी गर्छ उसलाई किनारा लगाउने सम्भावना हुने गरेको उनले बताइन् ।
चुनावमा टिकट दिने ठाउँमा पनि महिला हुनुपर्नेमा उनले जोड दिइन् ।
नेपाली कांग्रेसकी केन्द्रीय सदस्य पुष्पा भुसालले महिला चुनाव लडेर नेतृत्व लिन तयार रहेको बताइन् ।
चुनावमा महिलालाई आउन नदिने पुरुष मानसिकता पार्टीभित्र र बाहिर हुने गरेकाले त्यस्तो मानसिकता हटाउनुपर्ने उनले बताइन् ।
निर्वाचन पद्धति खर्चिलो भएको उल्लेख गर्दै उनले निर्वाचन पद्धति पनि पारदर्शी बनाउनुपर्ने धारणा राखिन् ।
नेपाली कांग्रेसकी केन्द्रीय सदस्य डा. आरजु राणाले राजनीतिमा योगदान गरेका महिलाहरुलाई अगाडि बढाउन राजनीतिक दलले ध्यान दिनुपर्ने बताइन् ।
अग्रजसँग सम्पर्कमा रहने र सम्मान गर्नुपर्ने पनि उनले बताइन् । केन्द्रीय सदस्य राणाले आफ्नो सन्तानलाई महिलालाई सम्मान गर्न सिकाउनुपर्ने बताइन् ।
उनले महिला आफ्नो अधिकार प्राप्तिको निम्ति सचेत हुनुपर्ने बताइन् ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।