रुस र युक्रेनका क्लबमा रहेका विदेशीले आफ्नो सम्झौता अवधि बाँकी रहेको भए पनि त्यसलाई टुंग्याउन पाउने भएका छन् । विश्व फुटबलको सर्वोच्च निकाय फिफाले रुस र युक्रेनका क्लबमा आवद्ध विदेशी खेलाडी तथा प्रशिक्षकले अस्थायीरूपमा सम्झौता टुंग्याउन सक्ने जनाएको हो । 

रुसले युक्रेनमाथिको आक्रमण जारी राखेपछि फिफाले रुस र युक्रेनमा रहेका विदेशी खेलाडी तथा प्रशिक्षकले सम्झौता अन्त्य गरेर अन्यत्र जान पाउने जनाएको छ । तर यो प्रावधान भने सिजनको अन्त्य अर्थात् ३० जुनसम्मका लागि मात्र लागू हुनेछ ।

त्यस्तै, फिफाले अन्य देशका क्लबहरूलाई रुस तथा युक्रेनमा खेलिरहेका विदेशी खेलाडीमध्ये दुई जनालाई अनुबन्धन गर्न पाउने समेत जनाएको छ । फिफाले रुसमाथि अन्तर्राष्ट्रिय फुटबल खेलका लागि प्रतिबन्ध लगाइसकेको छ ।