इटालियन सिरी ‘ए’ मा आज बिहान सम्पन्न खेलमा घरेलु टोली लाजियो विजयी भएको छ । लाजियोले स्टेडियो ओलम्पिकोमा भएको खेलमा भेनेजियामाथि १–० को कठिन जित हात पारेको हो ।

खेलको ५८ औं मिनेटमा सिरो इम्मोबिलेले पेनाल्टीमार्फत गरेको एक मात्रै गोल लाजियोको जितमा निर्णय बन्यो । लाजियोका लागि इम्मोबिलेको यो १४४ औं लिग गोल हो । योसँगै उनी सिरी ‘ए’ मा लाजियोका लागि सर्वाधिक गोल गर्ने खेलाडी बनेका छन् ।

इम्मोबिले २०२ खेलमा सिल्भियो पियोलको कीर्तिमान पनि तोडेका हुन् । पियोलले सन् १९३४ देखि १९४३ सम्म लाजियोबाट २२७ खेलमा १४३ गोल गर्दै कीर्तिमान बनाएका थिए ।  

यो जितसँगै २९ खेलमा ४९ अंक जोड्दै पाँचौं स्थानमा उक्लिँदा पराजित भेनेजिया २८ खेलबाट २२ अंकका साथ १८ औं स्थानमा छ ।