नेकपा (एकीकृत समाजवादी)का नेता एवं स्वास्थ्य मन्त्री विरोध खतिवडाले एमालेले राप्रपासँग चुनावी गठबन्धन गर्न गृहकार्य गरिरहेको बताएका छन् ।
मंगलबार गोरखामा पत्रकारसँग कुराकानी गर्दै नेता खतिवडाले भने, ‘कम्युनिस्ट भएर पनि कांग्रेससँग गठबन्धन गर्यो भनेर माधव नेपाल र प्रचण्डलाई विभिन्न टिप्पणी आइरहेको छ ।
‘केपी ओली नागार्जुन (पूर्वराजा) र राप्रपासँग गठबन्धनका लागि धाइरहेका छन् । आगामी चुनावमा ओलीले पनि राजावादीसँग गठबन्धन गर्दै छन्, गरेनन् भने म दुइटै त भन्दिनँ मेरो एउटा कानचाहिँ काटेर फाल्दिन्छु,’ उनले भने ।
वाम दलहरुबीच गठबन्धन हुन सक्ने भन्दै उनले एमालेसँग भने एकीकृत समाजवादी मात्र नभई अहिलेको ५ दलीय गठबन्धनका कुनै पनि दलले सहकार्य नगर्ने दाबी गरे । ‘सक्दाखेरि गठबन्धन गरेको राम्रो, तर सबै स्थानीय तहमा सकिन्न । उपमहानगर र महानगरमा भने गठबन्धन गरेर जाँदा सहज हुन सक्छ,’ उनले भने ।
कांग्रेससँग चुनावी गठबन्धन नभएमा जनमोर्चा, माओवादी, नेकपा एकीकृत समाजवादीलगायत दलबीच वाम गठबन्धन हुन सक्ने उनले बताए ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।