नेपालमा पेट्रोलियम पदार्थको खपत घटाउन नेपाल आयल निगमले दुई दिन सार्वजनिक बिदाको प्रस्ताव गरेको छ । इन्धनको खपत घटाउन उद्योग वाणिज्य तथा आपूर्ति मन्त्रालयलाई १० बुँदे प्रस्ताव पठाउँदै निगमले शनिबार र आइतबार सार्वजनिक बिदाको व्यवस्था गर्न भनेको हो ।

'सार्वजनिक तथा सरकारी सवारी साधनहरूको प्रयोग कम गराउने उद्देश्यले शनिबार र आइतबार दुई दिन बिदा दिने व्यवस्था मिलाउन' निगमको प्रस्ताव नम्बर ५ मा भनिएको छ । बिदाका दिन सवारीसाधनको सञ्चालन कम भई इन्धनको खपत घट्ने निगमले जनाएको छ ।

त्यस्तै, निगमले अत्यावश्यकबाहेक निजी र सरकारी सवारीसाधनमा जोर-बिजोर प्रणाली लागू गर्न, इन्धनमा लाग्दै आएको भन्सार शुल्क, मूल्य अभिवृद्धि कर र पूर्वाधार शुल्क लगायतमा सरकारले प्रतिलिटर १५ रुपैयाँ घटाउन पनि प्रस्ताव गरेको छ ।

पेट्रोल र डिजलबाट चल्ने सवारी साधनको आयातलाई निरुत्साहित गर्दै विद्युतीय सवारी साधनमा प्रोत्साहन गर्न, खाना पकाउने एलपी ग्यासको प्रयोग नगरी विद्युतीय चुलो प्रयोग गर्नका लागि आह्वान गर्न पनि प्रस्ताव गरेको छ ।