इन्डियन प्रिमियर लिग (आइपिएल)मा गुजरात टाइटन्सले लगातार तेस्रो जित हात पारेकाे छ ।
गुजरातले गए रातिकाे खेलमा पञ्जाब किंग्समाथि ६ विकेटकाे जित दर्ज गरेकाे हाे ।
१९० रनकाे लक्ष्य गुजरातले अन्तिम बलमा ४ विकेट गुमाउँदै पूरा गर्याे । उसका लागि शुभमन गिलले उत्कृष्ट प्रदर्शन गरे ।
उनले ५९ बलमा ११ चाैका र एक छक्कासहित ९६ रन बनाए । शाई सुधर्शनले ३५ र कप्तान हार्दिक पाण्डेयले २७ रन जाेडे ।
रोमाञ्चक बनेको खेलको अन्तिम ओभरमा गुजरातलाई १९ रन आवश्यक थियो ।
ओभरको पहिलो बलमा हार्दिक पण्डेय आउट भएपछि राहुल टेवाटिया क्रिजमा आए ।
दोस्रो बलमा राहुलले १ रन जोडे । तेस्रो बलमा डेभिड मिलरले चौका प्रहार गरे भने चौंथो बलमा १ रन जोडेपछि गुजरातलाई दुई बलमा १२ रन आवश्यक भयो ।
स्ट्राइकमा रहेका राहुलले पाँचौं र छैटौं बलमा लगातार छक्का प्रहार गर्दै गुजरातलाई राेमाञ्चक जित दिलाए ।
राहुलले ३ बलमा अविजित १३ रन जोड्दा मिलर ६ रनमा अविजित रहे ।
पञ्जाबका कागिसो राबडाले दुई तथा राहुल चाहरले एक विकेट लिँदा एक विकेट रन आउटका रूपमा प्राप्त भयाे ।
त्यसअघि मुम्बईस्थित ब्रेबोर्न स्टेडियम टस हारेर ब्याटिङकाे निम्ताे पाएकाे पञ्जाबले २० ओभरमा ९ विकेट गुमाएर १८९ रन बनाएको थियो ।
पञ्जाबका लियम लिभिङ्गस्टोनले ६४ रनको अर्धशतकीय पारी खेले । उनले २७ बलमा सात चाैका र चार छक्का प्रहार गरे ।
शिखर धवनले ३५ र जितेश शर्माले २३ रन जाेड्दा राहुल चाहर २२ रनमा अविजित रहे ।
गुजरातका राशिद खानले तीन, दर्शन नलकन्देले दुई तथा माेहम्मद शामी, हार्दिक पाण्डेय र लाेकी फर्गुसनले एक-एक विकेट हात पार्दा एक विकेट रन आटका रूपमा प्राप्त भयाे ।
याे जितसँगै तीन खेलमा ६ अंक जाेड्दै गुजरात दोस्रो स्थानमा उक्लिएको छ ।
दोस्रो हार बेहाेरेकाे पञ्जाब चार खेलमा दुई अंकका साथ छैटौं स्थानमा छ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
