नेपाल प्रो क्लब च्याम्पिनसिप क्रिकेट प्रतियोगितामा विभागीय टोली त्रिभुवन आर्मी क्लबले लगातार दोस्रो जित हात पारेको छ ।
आर्मीले समूह ‘बी’ अन्तर्गत आज सम्पन्न खेलमा बंगलादेशको ट्यालेन्ट हन्ट क्रिकेट एकेडेमीमाथि ८ विकेटको सहज जित हात पारेको हो ।
९७ रनको लक्ष्य आर्मीले १४ ओभरमा २ विकेट गुमाउँदै पूरा गर्याे । उसका लागि रोहितकुमार पौडेलले अविजित ४१ रनको योगदान दिए ।
२६ बलको सामना गरेका रोहितले पाँच चौका र एक छक्का प्रहार गरे । हरि चौहानले २५ रन जोड्दा भीम सार्की १४ रनमा अविजित रहे ।
ट्यालेन्ट हन्टका लागि एमडी उमर र सन्दीप कुमारले एक-एक विकेट हात पारे।
त्यसअघि भैरहवाको सिद्धार्थनगरस्थित सिद्धार्थ क्रिकेट मैदानमा टस जितेर ब्याटिङ रोजेको ट्यालेन्ट हन्टले निर्धारित २० ओभरमा ८ विकेट गुमाउँदै ९६ रन बनाएको थियो ।
ट्यालेन्ट हन्टका लागि अबिदुर कैफले सर्वाधिक २३ रनको योगदान दिए । उत्तम मगरले १६ र कप्तान मोहम्मद मोशर्रफले अविजितले १५ रन जोडे ।
आर्मीका लागि कुशल मल्लले तीन, सुशन भारी र सोमपाल कामीले दुई-दुई तथा शाहब आलमले एक विकेट हात पारे ।
जितसँगै दुई खेलमा चार अंक जोडेको आर्मीले सेमिफाइनल सम्भावना बलियो बनाउँदा लगातार दोस्रो पराजय बेहोर्दै अंकविहीन ट्यालेन्ट हन्टको भने कठिन बनेको छ ।
आर्मीले पहिलो खेलमा अर्को विभागीय टोली नेपाल एपिएफ क्लबलाई ५१ रनले हराउँदा ट्यालेन्ट हन्ट उत्तर प्रदेश-११ सँग ८ विकेटले पराजित भएको थियो ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।