काठमाडौं– आइतबारबाट प्रदेश २ र ५ बाट पनि वैदेशिक रोजगरीमा जानका लागि श्रम स्वीकृति लिन पाइने भएको छ । आइतबार प्रदेश २ बाट पहिलोे श्रम स्वीकृति एमडी जिलानी मोमिनले कतार जानका लागि लिए । यस्तै, बुटवलबाट पहिलो श्रम स्वीकृति वीरबहादुर माझीले मलेसियाको लागि लिए ।

यसअघि, काठमाडौंको वैदेशिक रोजगार विभागबाट मात्रै श्रम स्वीकृति दिने गरिएको थियो । 

जनकपुरबाट मोमिनले कतारमा लेबरको रुपमा काम गर्न जानका लागि श्रम स्वीकृति पाएका छन् । उनले प्रतिमहिना १४ सय रियाल तलबमा श्रम सम्झौता गरेका हुन् ।

यस्तै, बुटवलबाट माझीले मलेसियामा फ्याक्ट्री वर्करको लागि श्रम स्वीकृति पाएका छन् । श्रम स्वीकृतिमा उनको तलब १२ सय रिंगेट तोकिएको छ ।

सरकारले संघीय प्रणालीअनुसार सातै प्रदेशबाट श्रम स्वीकृति दिने व्यवस्था मिलाउन लागेको बताएको छ । त्यसैको प्रक्रियास्वरुप पहिलो चरणमा दुई प्रदेशमा सेवा विस्तार गरेको श्रम, रोजगार तथा सामाजिक सुरक्षा मन्त्रालयले बताएको छ ।

अब प्रदेशबाटै श्रम स्वीकृतिसहित वैदेशिक रोजगारीका लागि आवश्यक सेवाहरु प्रदान गर्ने मन्त्रालयले जनाएको छ ।