स्थानीय निर्वाचन मिति नजिकिएसँगै सत्तारुढ कांग्रेस र प्रमुख प्रतिपक्षी नेकपा एमालेका नेताहरूबीच दोहोरी चलिरहेको छ । मंगलबार एक सार्वजनिक कार्यक्रममा एमाले अध्यक्ष केपी शर्मा ओलीले कांग्रेसको चुनावी घोषणापत्रलाई ‘पागलहरूको प्रलाप’ को संज्ञा दिएपछि यी दुई पार्टीका नेताहरूबीच दोहोरी चलिरहेको हो । 

ओलीको टिप्पणीको जवाफ बुधबार कांग्रेस महामन्त्री गगन थापाले दिएका थिए । त्यसक्रममा उनले ओलीलाई बालकोट गएर ‘ट्युसन पढाउँछु’ समेत भने । थापाको अभिव्यक्ति सुनेपछि एमाले स्थायी कमिटी सदस्य शेरबहादुर तामाङले उनीप्रति व्यंग्य गरेका छन् ।

तामाङले थापालाई ‘ट्युसन पढाएको ज्याला चाहिँ कति लिने’ भनेर प्रश्नसमेत गरेका छन् ।

‘एक जना बबुरो बर्बराउँछ र भन्छ– केपी ओलीलाई बालकोट गएर ट्युसन पढाउँछु । साँच्चै ट्युसन पढाउन आयो भने ज्याला (ट्युसन फी) त दिनु नै पर्ला’, तामाङले बिहीबार बिहान सामाजिक सञ्जालमा लेखेका छन्, ‘ज्याला चाहिँ के दिने होला? लौ न बताइदिनुहोला, कमसेकम हामीलाई सजिलो हुनेछ ।’