विराटनगरमा देउवाप्रति ओलीको व्यंग्य : गठबन्धन किन अरे भन्दा 'एमाले देखेनौँ एमाले' भन्दै तर्सिएर
फरकधार / २४ बैशाख, २०७९

नेकपा (एमाले) का अध्यक्ष तथ पूर्वप्रधानमन्त्री केपी शर्मा ओलीले सत्ता गठबन्धनप्रति व्यंग्य गर्दै प्रधानमन्त्री शेरबहादुर देउवा ढोडको लौरो टेकेर हिँडिरहेको बताएका छन् ।



शनिबार विराटनगरमा एमाले विराटनगर महानगर कमिटीले आयोजना गरेको चुनावी भेलालाई सम्बोधन गर्दै अध्यक्ष ओलीले यस्तो बताएका हुन् ।

‘देउवाजीले के गरेको थाहा छैन । कांग्रेसले के गरेको थाहा छैन,' उनले भने, ‘गठबन्धनको नाममा उहाँ ढोडको लौरो टेकेर हिँडिरहनुभएको छ ।’

अध्यक्ष ओलीले पाँच दलीय सत्ता गठबन्धन एमालेको शक्ति देखेर डराएको टिप्पणी गरे । प्रधानमन्त्री देउवाप्रति लक्षित गर्दै अध्यक्ष ओलीले मुख्य प्रतिस्पर्धी कांग्रेस नै तर्सिएको दाबी गरे ।



‘त्यो गठबन्धन विचराको अनुहार हेर्नुस् । अनुहार हेर्दै कस्तो कस्तो,’ उनले भने, ‘गठबन्धन किन अरेभन्दा, एमाले देखेनौँ, एमाले भन्दै तर्सिएका छन् ।’

प्रधानमन्त्री देउतापत्नी आरजु देउवाले शुक्रबार एक कार्यक्रममा चार/पाँच जना युवालाई मलेसिया पठाइदिन्छु भनेको विषयमा समेत अध्यक्ष ओलीले कडा टिप्पणी गरे ।

‘केही चार/पाँच युवालाई फ्रि भिसा, फ्रि टिकटमा विदेश पठाइदिन्छु मिल्छ ?’ उनले भने, ‘हामी चार/पाँच जना होइन चार/पाँच लाख बढीलाई स्वदेशमै रोजगारीको वातावरण सिर्जना गर्छौं ।’

अध्यक्ष ओलीले माओवादी केन्द्रका अध्यक्ष प्रचण्डले चितवनका दिएको अभिव्यक्तिको पनि चर्को आलोचना गरे ।

‘उहाँहरूको भोट माग्ने शैली हेर्नुस् । मेरी छोरीलाई सक्नुहुन्छ भोट हाल्नुहोस, नत्र ठूलो दुर्घटना हुन्छ । जितेँ भने म खुसी हुन्छु, १५ वर्ष गठबन्धन चल्छ भने,’ उनले भने, ‘साथीहरूले जति भन्नु छ भन्नुस् । किनकि ३० गतेको मतदान उहाँहरूका लागि अन्तिम हो ।’

अध्यक्ष ओलीले नेकपा (एकीकृत समाजवादी) का अध्यक्ष माधव नेपालप्रति पनि कटाक्ष गरे । उनले माधव नेपाल आफैँ कुहिएको फर्सी रहेको बताए ।

‘एमालेलाई कुहिएको फर्सी भन्ने माधव नेपाल आफैँ कुहिएको फर्सी हुन् । यही पार्टीको उनले १५ वर्ष टुप्पामा बसेर रस चुसे । २१ महिना प्रधानमन्त्री भए,’ उनले भने, ‘त्यही पार्टीलाई त्यसो भन्ने ?’

अध्यक्ष ओलीले समृद्ध विराटनगरका लागि विराटनगर महानगरमा एमालेका उम्मेदवार सागर थापा र शिल्पा कार्कीको टिमलाई जिताउन आग्रह गरे । उनले थापाको टिमलाई जिताएर विराटनगरको चौतर्फी विकास आफूले जिम्मा लिने बताए ।

‘यस ठाउँको जिम्मेवारी एमालेले मात्र पूरा गर्नेछ । हेन्सम देखेर अरूलाई भोट नहाल्नुस्,’ उनले भने, ‘एमालेबाहेक अरू पार्टीबाट देश बन्दैन । त्यसैले ढुक्क भएर एमालेलाई मत दिनुहोस् ।’

  • प्रकाशित मिति : बैशाख २४, २०७९ शनिबार १८:३७:३७,   अन्तिम अपडेट : बैशाख २४, २०७९ शनिबार २०:०:२

फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, टिकटक, युट्युबमा पनि जोडिन सक्नुहुन्छ ।


यस विषयसँग सम्बन्धित समाचार

यो सामग्री सेयर गर्नुहोस्


यो पनि नछुटाउनुहोस्
मल्टिमिडिया