काठमाडाैं– संसद्को लेखा समितिले वाइडबडी जहाज खरिदमा बहालवाला मन्त्रीसहितलाई दोषी ठहर्याएपछि सरकारले छुट्टै छानबिन समिति गठन गरेकोप्रति प्रमुख प्रतिपक्षी नेपाली कांग्रेसका वरिष्ठ नेता रामचन्द्र पौडेलले आक्रोश व्यक्त गरेका छन् । वाइडबडी जहाज खरिदमा भएको अनियमितता ढाकछोप गर्न सरकारले छानबिन समिति गठन गरेको पोडेलको आरोप छ । 

नेता पौडेलले राजनीतिमा तीनतिर फर्केका नेता खान पाएपछि एकैतिर फर्कने गरेको बताए । गृहजिल्ला तनहुँमा शुक्रबार आयोजित कार्यक्रममा पौडेलले यस्तो आरोप लगाएका हुन् ।

उपसमितिको प्रतिवेदन मान्दिनँ भनेर समितिलाई नै अपमान गरिएको उनले बताए । ‘लेखा समितिअन्तर्गत उपसमितिले वाइडबडी खरिदमा भएको अनियमितताबारे छानबिन गरिरहेकै अवस्थामा सरकारले छुट्टै समिति गठन गर्नु भनेको अनियमितता लुकाउन खोजेको हो,’ पौडेलले भने । वाइडबडी जहाज खरिदमा ठूला नेताहरू संलग्न रहेको हुन सक्ने उनको आशंका छ । 

‘राजनीतिमा तीनतिर फर्केका नेताहरू खान पाएपछि एकैतिर फर्कन्छन्,’ पौडेलले भने, ‘सबै मिलेर ठूला भ्रष्टाचार काण्ड त गरेका होइनन् भन्ने प्रश्न पनि उठेको छ।’ 

पौडेलले नेपाली कांग्रेसको महासमिति बैठकपछि पार्टीमा एकता देखा परेको बताए । १४औँ महाधिवेशन समयमै गरेर अर्को चुनावका लागि गाउँदेखि सहरसम्म संगठन विस्तार तथा सुदृढीकरण अभियान चलाउनुपर्ने पौडेलको भनाइ थियो ।