विराटनगर– नेपाली कांग्रेसका सभापति शेरबहादुर देउवाले पुर्पक्षका लागि थुनामा रहेका सांसद रेशम चौधरीलाई किन शपथ गराइयो भन्ने आफूलाई थाहा नभएको बताएका छन् ।

शुक्रबार विराटनगर विमानस्थलमा पत्रकारसँग कुरा गर्दै प्रतिनिधिसभाको प्रमुख प्रतिपक्षी दलका नेतासमेत रहेका देउवाले चौधरीलाई सरकारले किन शपथ गराएको हो, आफूले बुझ्न नसकेको बताए । 

देउवाले वर्तमान सरकार फ्लप भएको समेत दाबी गरे । दुईतिहाइको दम्भमा रहेको सरकारले अब देश चलाउन नसक्ने दाबी गर्दै उनले ‘पोस्टर टाँगेर अब देश नचल्ने’ टिप्पणी गरे ।

प्रतिपक्ष कमजोर भयो भन्ने सन्दर्भमा देउवाले भने ‘तपाईंहरु छाप्नु हुन्न, बोलेको बोल्यै छु त म ।’

वाइडबडी विमान खरिद छानबिन प्रकरणमा भने देउवाले आफूले लेखा समितिको उपसमितिको प्रतिवेदन अध्ययन नगरेको भन्दै त्यस विषयमा जानकारी नभएको बताए ।

निर्माला पन्तको बलात्कारपछि हत्यामा संलग्नलाई कारबाही नसक्नु सरकारको लाचारीपन भएको उनले दोहोर्याए । यो सानो घटना होइन भन्दै देउवाले निर्मलाको परिवारले न्याय नपाएसम्म कांग्रेसले यो विषय नछाड्ने उल्लेख गरे ।

समायोजनमा जान नमान्ने कर्मचारीलाई कारबाही गर्नुभन्दा सुविधा बढाएर पठाउनुपर्ने उनको धारणा रह्यो । कर्मचारीलाई आतंकित बनाउनुभन्दा पनि थप इन्सेन्टिभ दिनुपर्ने उनको तर्क छ ।