पहिलोपटक घरेलु मैदानमा अन्तर्राष्ट्रिय शृंखला खेलेको नेपाल दोस्रो खेलमा युगाण्डाविरुद्ध आज खेल्दैछ । कीर्तिपुरस्थित त्रिवि क्रिकेट मैदानमा उत्रँदै गर्दा नेपाल शृंखला १–१ को स्थितिमा झार्न चाहन्छ । 

रुबिना क्षेत्रीको कप्तानीमा रहेको नेपाल पहिलो खेलमा युगाण्डासँग १२ रनले पराजित भएको थियो । सीता राना मगरको अनुपस्थितिमा बलिङमा सुधारिएको प्रदर्शन गरेको नेपाल ब्याटिङ र फिल्डिङमा भने कमजोर देखिएको थियो ।

युगाण्डालाई १०३ रनमा रोकेको नेपाल ९० रनमा समेटिएको थियो । दोस्रो खेलमा भने कप्तान रुबिना र प्रशिक्षक जगत टमटाले कमजोरी सुधार गर्दै खेलमा फर्कने बताएका छन् ।

पहिलो खेलमा नेपालकी अस्मिना कर्माचार्यले डेब्यु गरेकी थिइन् । नेपाल र युगाण्डाबीचको शृंखला पाँच खेलको हुनेछ । नेपाली महिला टिमले घरेलु मैदानमा खेलेको यो पहिलो सिरिज हो ।