धनगढी उपमहानगरपालिकाको मेयरका स्वतन्त्र उम्मेदवार गोपाल हमालको जित निश्चित भएको छ । गन्न बाँकी मतभन्दा मतान्तर बढी भएपछि हमालको जित निश्चित देखिएको हो ।

मुख्य निर्वाचन अधिकृतको कार्यालयले शनिबार बेलुका ५ बजे सार्वजनिक गरेको मतपरिणामअनुसार मेयर पदका स्वतन्त्र उम्मेदवार हमालले ११ हजार ७५८ मतको अग्रता लिएका छन् ।

६३ हजार ७१५ मत खसेको धनगढीमा ५६ हजार २२६ मत गन्दा हमालले २४ हजार ५२९ मत पाएका छन् । सत्ता गठबन्धनबाट उम्मेदवार बनेका नेपाली कांग्रेसका नृपबहादुर वडले १२ हजार ७७१ मत प्राप्त गरेका छन् ।

यस्तै, नेकपा एमालेका उम्मेदवार रणबहादुर चन्दले ७ हजार ३८३ मत ल्याएर तेस्रो स्थानमा छन्  अब धनगढीमा करिब साढे ७ हजार मत मात्रै गन्न बाँकी छ ।
१९ वटा वडा रहेको धनगढीमा हालसम्म १, २, ३, ४, ५, ६, ७, ८, १३, १४, १५, १६, १७, १८ र १९ वडाको मतगणना सकिएको छ ।