बर्दियाको राजापुर नगरपालिकाले सामुदायिक विद्यालयमा कार्यरत शिक्षक तथा कर्मचारीलाई कुनै पनि राजनीतिक दलको जिम्मेवारीमा रहे तत्काल राजीनामा दिन निर्देशन दिएको छ ।

नवनिर्वाचित मेयर दिपेश थारूले नगरभित्रका सबै विद्यालयलाई पत्र लेख्दै पालिकाभित्र रहेका सबै सामुदायिक विद्यालयका शिक्षक कर्मचारीलाई दलको राजनीतिमा लागेको भए सात दिनभित्र राजीनामा दिएर त्यसको जानकारी नगरपालिकालाई दिन निर्देशन दिएका हुन् ।

सो पत्रमा शिक्षा ऐन २०२८ (संशोधन सहित) को दफा १६, ‘ङ’ को उपदफा ५ को ६ मा उल्लेखित व्यवस्था उल्लंघन गरी कुनै दलको कार्यकारिणी पदमा रही विद्यालयको पठनपाठनमा प्रभावित हुने आचरणमा नपर्न सबैलाई आग्रह गरिएको छ ।

थारू केही दिनअघि नेकपा माओवादी केन्द्रबाट मेयरमा निर्वाचित भएका थिए । उपमेयरमा पनि माओवादीबाटै मनकलाकुमारी चौधरी विजयी भएकी थिइन् ।