नेपाली फुटबलको सर्वोच्च निकाय अखिल नेपाल फुटबल संघ (एन्फा) को निर्वाचन मिति नजिकिँदैछ । यसपटक ६ असारमा नयाँ नेतृत्वका लागि एन्फा चुनाव हुन लागेको हो । चुनावी मैदानमा अघिल्लोपटक एउटै प्यानलबाट जितेका कर्माछिरिङ शेर्पा र पंकजविक्रम नेम्वाङ छन् । शेर्पा वर्तमान एन्फा अध्यक्ष र नेम्वाङ वरिष्ठ उपाध्यक्ष हुन् । अघिल्लोपटक मिलेर चुनाव जितेका शेर्पा र नेम्वाङबीचको भिडन्त रोचक हुने अनुमान छ । शेर्पा लगातार दोस्रोपटक चुनाव जित्दै एन्फाको नेतृत्व लिन चाहन्छन् । नेम्वाङ पनि अध्यक्ष जित्न पूरा तयारीका साथ लागेका छन् । दुवैजना लामो समयदेखि नेपाली फुबटलको समस्यासँग नजिक छन् । तर, उनीहरूमाथि पहिलो कार्यकालमा आफ्नो एजेण्डाअनुरूप काम गर्न नसकेको आरोप लाग्छ । यसैबीच, चुनाव केन्द्रित रहेर फेरि एन्फा अध्यक्षमा दोहोरिन खोजेका शेर्पासँगफरकधारकर्मी लोकेश धामीले कुराकानी गरेका छन् :

दोस्रो कार्यकालका लागि चुनावी मैदानमा हुनुहुन्छ, किन दोहोरिन चाहनुभयाे?  

हामीले सुरुवात गरेका धेरै काम बाँकी छन् । ती कामलाई पूरा गर्न, गरेका कामलाई निरन्तरता र स्थायित्व दिनका लागि नै दोहोरिन चाहेको हो । फुटबललाई आर्थिकरूपमा सबलीकरण गर्ने, व्यावसायिकतातर्फ उन्मुख गराउने हाम्रो अभियान छ । त्यसलाई मूर्तरूप दिन, पूर्वाधार निर्माणका लागि धेरै पोजेक्टहरू बनिरहेका छन् । ती प्रोजेक्टलाई पूरा गर्ने, युथ, ग्रास रुट प्रोग्रामलाई थप व्यवस्थित गर्ने प्लान छ । साथै, यी कार्यक्रमलाई निरन्तरता दिनका लागि योजना बनाउन, फुटबल क्लब, जिल्लाहरूलाई आर्थिकरूपमा सबल बनाउन, बाँकी रहेका ट्रेनिङ ​सेन्टरहरूको निर्माण पूरा गर्न, अखिल नेपाल फुटबल संघको हरेक कामलाई डिजिटलाइज्ड गर्नेलगायत काम पूरा गर्न पुनः एन्फामा आउन खोजेको हो ।  

आफ्नो पहिलो कार्यकाललाई कसरी मूल्यांकन गर्नुहुन्छ?

कोभिडको जतिसुकै प्रभाव परे पनि हामीले राष्ट्रिय/अन्तर्राष्ट्रिय प्रतियोगितालाई निरन्तरता दिने काम गर्यौं । हामी निर्वाचित हुनुभन्दा अगाडि लिगहरू सञ्चालन भएका थिएनन् । जब हामी आयौं त्यसपछि ‘ए’, ‘बी’, ‘सी’ डिभिजन लिगको आयोजना गर्यौं । अहिले धेरै खेलाडी उत्पादन हुनुको कारण पनि लिगहरू सञ्चालन हुनु नै हो । आउने दिनहरूमा लिगलाई व्यवस्थित, एन्फा क्यालेन्डरलाई चुस्तदुरुस्त बनाउने, क्यालेन्डर चेन्ज नहुने खालको कार्यक्रम बनाउने । सबै पक्षसँग सल्लाह गरेर दीर्घकालिन अपरेसन क्यालेन्डर पनि बनाउँछौं । 

तपाइँले पहिलो कार्यकालमा गरेका काम बुँदागत रूपमा भन्दा के–के हुन्? 

पहिलो कार्यकाल धेरै उपलब्धिमूलक भएको महसुस गरेको छु । हामीले चार वर्षको अवधिमा महिला–पुरुष गरी ७० अन्तर्राष्ट्रिय खेलमा भाग लिन र आयोजना गर्न सफल भयौं । महिलामा चार अन्तर्राष्ट्रिय प्रतियोगितामा हाम्रो टोली उपविजेता बन्यो । पुरुषतर्फ साउथ एसियन गेममा गोल्ड मेडल जित्यौं । थ्री नेशन्सको च्याम्पियन भयौं । साफ च्याम्पियनसिपको फाइनलमा पुग्न सफल पुग्यौं । यो पनि इतिहास रचेको अवस्था छ । हाम्रो टोली महिला ओलम्पिकको दोस्रो चरणमा पुग्न पनि सफल भयो । एएफसी यू–१९ को दोस्रो चरणमा पनि पुग्न सफल भयौं । यो पनि उपलब्धि नै हो । हाम्रै पालामा ग्रास रुट ग्रोथ मेम्बरसिप प्राप्त भयो । बी लाइसेन्स कोचिङ कोर्स गर्न पाउने मान्यता पाएका छौं यो पनि नेपालका लागि नयाँ इतिहास नै हो । पोखरामा ‘एक्सिलेन्ट सेन्टर’ बनाउने जुन प्रोजेक्ट छ त्यसको डीपीआर, इआइए सकाएर टेन्डरको प्रक्रियामा अगाडि बढिसकेको छ । त्यति मात्र होइन जिल्लाजिल्लामा ट्रेनिङ सेन्टर बनाउने कामहरू पनि सुचारु गर्नुपर्ने अवस्था छ । पहिलोपटक ‘ए’ डिभिजन फुटसलको खेल लाइभ देखायौँ । साथै, यो सालको लिगको खेलहरू फ्लड लाइटमा सञ्चालन पनि गर्न सफल भयौं । लिगको ९२ म्याचमा ७२ खेल त हामीले टेलिभिजनबाट लाइभ देखायौँ । यसरी हेर्दा चार वर्ष सफल भएको मानेका छौं ।   

यिनै हुन् यसपालि चुनाव जित्ने आधार? 

कामको मूल्यांकनको आधारमा जित्छु । साथीहरूले मैले गरेको काम नजिकबाट हेर्नु भएको छ । म नेपाली फुटबलका लागि कति आवश्यक मान्छे हुँ भनेर उहाँहरू सबैलाई थाह छ । क्षेत्रीयताको आधारमा, जातियताको आधारमा, आर्थिक कारणले भोट कसैलाई दिनुहुन्न । अनुभवी, उसको कार्यक्षमताको आधारमा नै भोट दिनुपर्छ । मलाई आशा छ साथीहरूले सही व्यक्तिलाई छान्नु हुनेछ । 

अघिल्लोपटक एउटै प्यानलबाट चुनाव लडेका वरिष्ठ उपाध्यक्ष पंकजविक्रम नेम्वाङसँग यसपालि अध्यक्षका लागि भिड्दै हुनुहुन्छ, यो क्षणलाई कसरी लिनुहुन्छ?

यो विषयलाई म सामान्य ढंगले लिन्छु । किनभने हामी आइसकेपछि एन्फामा निर्वाचन भयो । यो पनि राम्रो कुरा हो । निर्वाचन हुनुपर्छ, डेमोक्रयाटिक एक्सरसाइज हुनुपर्छ, स्वच्छ प्रतिस्पर्धा हुनुपर्छ, एजेण्डाका साथमा प्रतिस्पर्धा हुनुपर्छ । एजेण्डाका साथ प्रतिस्पर्धा नगर्दा मान्छेले पत्याउँदैनन् । यो अवस्थालाई फुटबलको ९० मिनेटको म्याचजस्तै लिनुपर्छ । अर्थात् सामान्य ढंगले लिनुपर्छ, जसले जित्छ उसले फुटबल संघ चलाउँछ । 

दोस्रोपटक पनि एन्फा अध्यक्षमा विजयी हुनु भएमा कुन–कुन विषयलाई प्राथमिकतामा राख्नुहुन्छ? 

पहिलो कार्यकालमा गर्न बाँकी र भइरहेका कामलाई प्राथमिकता दिन्छु । साथै, अखिल नेपाल फुटबल संघको प्रशासनलाई चुस्तदुरुस्त, व्यावसायीकरण प्रशासनको रूपमा विकास गर्छौं । साथै, आर्थिक पारदर्शिताको विषयलाई पनि जोड दिनेछौँ । त्यस्तै, पूर्वाधारको कुरामा जिल्ला र क्लबको ट्रेनिङ सेन्टर, एक्सिलेन्स सेन्टर निर्माण गर्ने काम, लिगहरू सञ्चालन गर्ने कामलाई पनि उच्च प्राथमिकतामा राख्नेछौँ । १२ महिना नै नेपाली फुटबललाई व्यस्त बनाउने काम गछौं । 

एन्फामा राजनीति बढी भयो, त्यसको असर खेलाडीमै पर्‍यो भन्ने गुनासो छ । निर्वाचित भएमा त्यो गुनासो दोहोरिन नदिन के गर्नुहुन्छ?  

एन्फा गतिशील संस्था हो । डेमोक्रयाटिक एक्सरसाइज भएको छ । हिजो कसैले बोल्दैनथ्यो आज सबैलाई बोल्ने बानी भएको छ । यो चाहिँ राम्रो कुरा हो । मान्छेलाई बोल्ने अधिकारबाट कुण्ठित गर्नु हुँदैन । खेलाडी, रेफ्री, प्रशिक्षक, क्लबदेखि लिएर सबैलाई नेपाली फुटबलको हितको विषयमा बोल्ने अधिकार छ बोल्नुपर्छ । नियतसंगत ढंगले समाधान गर्ने काममा हामी लाग्छौं । अधिनायकवादी शैलीमा मान्छेलाई बोल्ने अधिकारबाट चाहिँ बञ्चित गर्ने काम हामीबाट चाहिँ हुन्न । 

एसियन कप छनोट र चुनावपछि मुख्य प्रशिक्षक परिवर्तन गर्ने भन्ने कुरा पनि यो विषयलाई चाहिँ कसरी समाधान गर्नुहुन्छ? 

प्रतिवेदनको आधारमा कार्यसमितिको बैठक बसेर व्यापक छलफल गर्छौं । अनि निश्कर्ष निकाल्छौँ । कार्यसमितिले जे निर्णय गर्छ, त्यही हुनेछ ।