श्रम, रोजगार तथा सामाजिक सुरक्षा मन्त्री कृष्णकुमार श्रेष्ठले वैदेशिक रोजगारीको बहानामा ठगी गर्ने कसैलाई छुट नहुने बताएका छन् ।

 बुधबारबाट भैरहवामा सञ्चालनमा आएको वैदेशिक रोजगार व्यवस्थापन शाखाको उद्घाटन गर्न रूपन्देही पुगेका मन्त्री श्रेष्ठले भने, ‘म जे बोल्छु त्यही गर्छु, गर्न सक्ने मात्र बोल्छु । सोझासाझा श्रमिकलाई ठगेर विदेश बस्ने दलालमाथि कानुनी कारबाही हुन्छ ।’

‘सोझासाझा नागरिकलाई ठगेर विदेश गएर बस्ने दलालहरूले अब ठगी गर्न नसोचे हुन्छ, हामी ठगी गर्न दिदैनौँ’, उनले चेतावनी दिँदै भने, ‘ठगी गरेर विदेश जाने दलालहरूलाई विश्वको जुनसुकै कुनामा भए पनि घिसारेर ल्याउँछौँ । विदेश पठाउने भन्दै ठगहरूले हाम्रा दाजुभाइलाई ठगिरहेका छन्, अब त्यस्ता ठगहरूलाई ठग्न दिइने छैन ।’ 

उनले ठगहरूविरुद्ध प्रहरी मार्फत रेड कर्नर नोटिस जारी गराएर विदेशमा लुकेर बसेकाहरूलाई स्वदेशमा ल्याउन लागेको जनाए ।