काठमाडौं– अमेरिकामा २२ डिसेम्बरदेखि सुरु भएको आंशिक हड्तालको प्रभाव नेपालमा पनि परेको छ । अमेरिकामा सटडाउन भएपछि नेपालस्थित राजदूतावासले पनि आफ्ना कामकारबाही आशिंक रुपमा सटडाउन गरेको छ ।
दूतावासकोे वेभसाइट पनि अपडेट गरिएको छैन् । २२ डिसेम्बरपछि सामाजिक सञ्जालहरु ट्वीटर र फेसबुकमा पनि अपडेट भएका छैनन् ।
फेसबुक पेज २४ डिसेम्बरमा अन्तिम पटक अपडेट गरिएकाे छ । कन्सलर सर्भिस २६ गतेदेखि सुरु हुने सुचना लेखेयता अन्य कुनै पनि सुचना उल्लेख छैन् ।
प्रत्येक चाडपर्वमा शुभकामना सन्देश दिने दूतावासले आज माघीकाे अवसरमा कुनै पनि किसिमकाे शुभकामना प्रेषित गरेकाे छैन् ।
२२ डिसेम्बरमा दूतावासकाे फेसबुक पेज, ट्वीटर तथा राजदुत र्यान्डी बेरीकाे ट्वीटर पेजमा यी पेजहरु अपडेट नहुने हुनाले अमेरिकी स्टेट डिपार्टमेन्टकाे ट्वीटर पेज फलाे गर्न भनिएकाे छ ।
मेक्सिको–अमेरिकी सीमामा पर्खाल बनाउने अमेरिकी राष्ट्रपति डोनाल्ड ट्रम्पको निर्णयका कारण अमेरिकामा केही समयदेखि राजनीतिक संकट देखिएको छ । डेमोक्रेट सांसदहरुले यो पर्खालको विरोध गर्दै आइरहेका छन् ।
पर्खाल बनाउने फन्डको विषयमा सहमती नभएपछि ट्रम्पले ८ लाख कर्मचारीको तलबका लागि बजेट पास गर्न हस्ताक्षर नगर्दा अमेरिका सटडाउनको अवस्थामा पुगेको हो ।
आप्रवासीका कारण अमेरिकामा मानवीय सुरक्षामा संकट आएकाे भन्दै ट्रम्प पर्खाल बनाउनु बाहेक अन्य विकल्प नभएकाे तर्क गर्छन् ।
डेमोक्रेट सांसदहरु यो पर्खाल बनाउन सहमत नभएसम्म सटडाउनलाई स्वीकार्न आफू तयार भएको ट्रम्पले बताउँदै आएका छन् । बेला बेलामा ट्रम्पले संकटकाल लगाउने चेतावनीसमेत दिँदै आएका छन् ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
