प्रदेशसभा सचिवालयको सवारी साधनको दुर्घटनाबाट घाइतेको उपचार खर्च सरकारले व्यहोर्ने भएको छ । 

मंगलबार मुख्यमन्त्री तथा मन्त्रिपरिषदको कार्यालयमा बसेको मन्त्रिपरिषद बैठकले बीमाको रकम अपुग हुने भएकाले प्रदेशसभा सचिवालयको सवारी साधनबाट दुर्घटनाका घाइतेको उपचार खर्च सरकारले व्यहोर्ने निर्णय गरेको हो । 

त्यस्तै, मन्त्रिपरिषद बैठकले कृषि मन्त्रालयअन्तर्गतको कटहरी फलफूल तथा तरकारी संकलन केन्द्र दोस्रो संशोधन नियमावली स्वीकृत गर्ने निर्णय गरेको छ । 

बैठकले अख्तियारको कारबाहीमा परेको कम्पनीको सिलबन्दी प्रस्ताव मूल्यांकन प्रक्रियामा समावेश नगर्न निर्देशन दिने निर्णय समेत गरेको आन्तरिक मामिला तथा कानुनमन्त्री केदार कार्कीले जानकारी दिए । 

‘एउटा बोलपत्र आह्वान गर्दा कसैले सिलबन्दी प्रस्ताव गर्नुभएको थियो’ उनले भने,‘अख्तियारले उहाँको कम्पनीलाई सस्पेन्स गरेको कारणले गर्दा यसमा सामेल नगराउने निर्णय गरियो ।’ 

कार्कीका अनुसार बैठकले कृषि मन्त्रालयकै पूरक, संक्षिप्त, संगठन, संरचना तथा कर्मचारी दरवन्दी विवरण, यातायात व्यवस्था निर्देशनालय संगठन संरचना, सडक पूर्वाधार तथा शहरी विकास मन्त्रालयको अस्पताल भवन निर्माण पूर्वअनुमति सम्बन्धमा कार्यविधि २०७९ स्वीकृतिसमेत गरेको छ ।