मधेस प्रदेशको राजधानी जनकपुरधामस्थित जनकपुर न्युरो हस्पिटल एण्ड रिसर्च सेन्टर प्रालिले दुर्घटनामा परी टाउकोमा गम्भीर चोट लागेका एक बिरामीलाई मृत्युको मुखबाट जोगाएको छ । 

जनकपुर न्युरो हस्पिटलका सञ्चालक न्युरो सर्जन डा. विजयकुमार राउतले गम्भीर चोट​ (craniotomy and evacuation of hematoma) लागेका एक बिरामीको सफल शल्यक्रिया गरी ज्यान जोगाएका हुन् । डा. राउतले महोत्तरीको बलबा नगरपालिका–४ पडौलस्थान बस्ने परशुराम यादवका २२ वर्षीय छोरा अनितेशकुमार यादवको सफल शल्यक्रिया गरेका हुन् । 
 
मधेस प्रदेशको पहिलो न्युरो अस्पताल जनकपुर न्युरो हस्पिटल एण्ड रिसर्च सेन्टर प्रालिले दुर्घटनामा परी घाइते भएका अनितेशको साउन २ गते सफल शल्यक्रिया गरेर ज्यान जोगाएको हो । ६ घण्टा लामो समय लगाएर शल्यक्रिया गरिएको अनितेशलाई तीन दिन भेन्टिलेटरमा राखिएको थियो । 

डा. राउतले अनितेशको सफलतापूर्वक शल्यक्रिया गरेपछि उनको जीवन कायापलट भएको उनका पिता परशुरामले बताए । शल्यक्रियापछि अनितेश आफैँ हिँड्न, बोल्न र खान सक्छन् । उनको शल्यक्रियाको घाउ विस्तारै निको हुँदै गएको छ । 

‘उनी अलि कमजोर छन्, तर, डाक्टरले समयसँगै निको हुन्छ भन्नुभएको छ,’ परशुराम भन्छन्, ‘हामी धेरै खुसी छौँ, डाक्टरले मेरो छोराको जीवन बचाउनुभयो । हाम्रा लागि उहाँ भगवान् हुनुहुन्छ ।’

जनकपुरधामस्थित जनकपुर न्युरो अस्पताल न्युरोसम्बन्धी पहिलो हस्पिटल रहेको छ । यस अस्पतालले शरीरका विभिन्न भागको प्लास्टिक एवं कस्टेमिक सर्जरीलगायत अन्य सर्जन तथा रोगको उपचार सेवा पुर्याउंँदै आएको छ ।
 
नेपालमा प्लास्टिक एवं कस्टेमिक सर्जरीको व्यवस्था काठमाडौंपछि जनकपुरधामकै न्युरो अस्पतालमा रहेको दाबी डा. राउतले गरेका छन् । यस अस्पतालले नसा च्यापिएको, हात–खुट्टा झम्झमाउने, टाउको दुखेको, मिर्गी आउने र टाउकोभित्र रगत जमेकोलगायत न्युरो सेवासमेत प्रदान गरिरहेको छ ।