लन्डन– २०१८ मा विश्वका २६ धनी व्यक्तिले कुल जनसंख्याको आधा मानिस (गरिब) ले भन्दा ज्यादा धन कमाएको अन्तर्राष्ट्रिय च्यारिटी संस्था अक्सफाम इन्टरनेसनलको रिपोर्टले देखाएको छ ।

रिपोर्टमार्फत अक्सफामले बढ्दो असमानतासँग लड्न धनीहरुसँग ज्यादा कर असुल्न राष्ट्रहरुलाई आग्रह गरेको छ । 

सोमबार अक्सफामले सार्वजनिक गरेको एनुअल इनिक्वालिटी रिपोर्टले विश्वका डलर अर्बपतिहरुको सम्पत्ति २०१८ मा प्रतिदिन २.५ अर्ब डलर बढेको देखाउँछ, जब कि ३.८ अर्ब गरिबहरुको सम्पत्ति ११ प्रतिशतले घटेको छ । २००८ को ‘ग्लोबल फाइनान्सियल क्राइसिस’यता विश्वभरका डलर अर्बपतिको संख्या भन्डै दोब्बर भएको छ । 

‘विश्वका धनी व्यक्ति अमेजनका सिइओ जेफ बेजोसको सम्पत्ति २०१८ मा ११२ अर्ब डलरले बढ्यो,’ रिपोर्टमा उल्लेख छ । बेजोसको सम्पत्तिको जम्मा एक प्रतिशत साढे १० करोड जनसंख्या भएको मुलुक इथियोपियाको कुल स्वास्थ्य बजेटबराबर रहेको अक्सफामले उल्लेख गरेको छ । 

मंगलबार स्विटजरल्यान्डको डेभसमा हुने वर्ल्ड इकोनोमिक फोरमको पूर्वसन्ध्यामा अक्सफामले यस्तो तथ्य प्रस्तुत गरेको हो । 

विश्लेशकहरुले विश्वका ३.४ अर्ब मानिसले दैनिक ५.५ डलरभन्दा कम पैसाले गुजारा चलाइरहेको तथ्य पत्ता लगाएका छन् । बढ्दो असमानता र धनी–गरिबबीचको खाडलले गरिबीविरुद्धको अभियानलाई दबाउने मात्र नभई अर्थतन्त्रलाई नै बिगारिरहेको उनीहरुको विश्लेषण छ ।