बागलुङको ताराखोला गाउँपालिकाले द्वन्द्वको क्रममा भएका शहीद, वेपत्ताका परिवार, घाइते तथा अपाङ्गलाई मासिक भत्ता दिने भएको छ । १० वर्षे शसस्त्र द्वन्द्वको उद्गम स्थलको रुपमा रहेको ताराखोलाका शहीद, बेपत्ताका परिवार तथा घाइतेलाई गाउँपालिकाले मासिक भत्ता दिने भएको हो । 

पालिकाले शसस्त्र द्वन्द्वका क्रममा शहीद भएका तथा वेपत्ता भएका २७ जनाको परिवारलाई मासिक एक हजार ५०० का दरले भत्ता दिने निर्णय गरेको हो । पालिकाले द्वन्द्वका क्रममा नै भौतिक संरचना गुमाएको परिवारलाई रोजगारी दिने गरी पनि नीति ल्याएको छ । 

गाउँसभाबाट नीति तथा बजेटमा समेटे अनुसार पालिकाको कार्यपालिका बैठकबाट भत्ता वितरणको नीति बनाएर पारित भएपछि आगामी महिनादेखि मासिक भत्ता दिन थाल्ने ताराखोला गाउँपालिकाको तयारी छ ।