अर्थ मन्त्रालयका अर्थसचिव मधु मरासिनीलाई सरकारले प्रधानमन्त्री तथा मन्त्रिपरिषद्को कार्यालयमा सरुवा गरेको छ ।

बिहीबार बसेको बसेको मन्त्रिपरिषद्को बैठकले उनलाई प्रधानमन्त्री तथा मन्त्रिपरिषद्को कार्यालयमा काम गर्नेगरी सरुवा गरेको हो । उनी जनार्दन शर्मा अर्थ मन्त्रीमा पुन: नियुक्त भएलगत्तै बिदामा बसेका थिए ।

अर्थमन्त्री शर्मामाथि बजेट निर्माणका क्रममा अनधिकृत व्यक्तिलाई प्रवेश गराएर करको दर हेरफेर गरेको आरोप लागेपछि उनी असन्तुष्ट बनेका थिए । त्यसलगत्तै उनी बिदामा बसेका थिए । शर्माले अर्थमन्त्रीको पदबाट राजीनामा दिएपछि मन्त्रालय फर्किएका मरासिनी शर्मा नै पुनः मन्त्री नियुक्त भएपछि सरुवा मागेका थिए ।

सरकारले मरासिनीको स्थानमा राजश्व सचिव कृष्णहरि पुष्करलाई ल्याएको छ । अर्थ मन्त्रालयमा दुई जना सचिव रहने अभ्यास रहेको छ । नयाँ सचिव नखटाउँदासम्म पुष्करलाई उक्त जिम्मेवारी दिने सरकारले निर्णय गरेको हो ।