मधेस प्रदेशका मुख्यमन्त्री लालबाबु राउतलाई बर्खास्त गर्नुपर्ने माग गर्दै सभामुख सरोजकुमार यादवलाई ज्ञापनपत्र बुझाइएको छ । लोकतान्त्रिक समाजवादी पार्टी नेपाल निकट विद्यार्थी संगठन लोकतान्त्रिक विद्यार्थी संघले सभामुख यादवलाई ज्ञापनपत्र बुझाएको हो ।

अख्तियारले ठहर गरेको भ्रष्टाचारको आरोपित मुख्यमन्त्री र मन्त्रिमण्डल लगायतका कर्मचारीलाई तुरुन्त बर्खास्त गरी प्रदेशको गरिमा जोगाउन सभामुखसमक्ष संघले माग गरेको छ ।

ज्ञापनपत्रमा अख्तियार दुरुपयोग आयोगले २०७८ असोज १३ गते मुख्यमन्त्री कार्यालयबाट यस प्रदेशको लोकप्रिय कार्यक्रममध्ये ‘मुख्यमन्त्री बेटी बचाऊ बेटी पढाऊ’ कार्यक्रममा अनियमितता भएको उजुरी पर्न आएकोले छानबिनका लागि लगिएको फाइल र उपलब्ध कागजातहरुको आधारमा साउन १८ गते लामो सूक्ष्म अध्ययन र छानबिन पश्चात् मुख्यमन्त्री तथा मन्त्रिपरिषद्को कार्यालयबाट साइकल खरिद प्रक्रिया सुरु गर्दादेखि भुक्तानी कार्य गर्दासम्म मुख्यमन्त्री कार्यालयका कर्मचारी र साइकल आपूर्तिकर्ताले नेपाल सरकार/प्रदेश सरकारलाई बदनीयतपूर्वक १० करोड ३३ लाख रुपैयाँ गरेको भनी अख्तियारले पुष्टि गरि अदालतमा मुद्दासमेत दायर गरेको उल्लेख छ ।

यति मात्र नभई मुख्यमन्त्री कार्यालयद्वारा सञ्चालित स्वच्छता अभियानअन्तर्गत सार्वजनिक जग्गा तथा सामुदायिक विद्यालयमा शौचालय निर्माण, पोखरी सौन्दर्यीकरण, कोभिड अस्पताल निर्माण, जानकी मन्दिर सौन्दर्यीकरण, बीमा योजना, मधेस स्वास्थ्य विज्ञान प्रतिष्ठान आदि जस्ता कार्यक्रममा पनि अनियमितता भएको लोकतान्त्रिक विद्यार्थी संघले ठहर गरेको छ ।

जनभावनाको विपरीत गई प्रदेशको गरिमा माथी ठेस पुग्ने कार्य भएमा आफूहरु बाध्य भएर जनतासामु प्रदेश रक्षाको निम्ति कडा संघर्षमा उत्रिन बाध्य हुने संघले चेतावनीसमेत दिएको छ ।

लोकतान्त्रिक विद्यार्थी संघका प्रदेश अध्यक्ष मिथलेश यादवको संयोजकत्वमा केन्द्रीय विद्यार्थी नेता रोशन मिश्रको अगुवाई तथा लोकतान्त्रिक युवा संघका जिल्ला अध्यक्ष प्रशान्त झा, सचिव रोशन साह, प्रदेश स्तरीय विद्यार्थी नेता त्रिदेव मिश्रलगायतका विद्यार्थी नेताहरुको उपस्थितिमा सभामुख यादवलाई ज्ञापनपत्र बुझाइएको छ ।

लोकतान्त्रिक विद्यार्थी संघले यसअघि शुक्रबार मधेस प्रदेशका मुख्यमन्त्रीसहित मन्त्रिमण्डललाई बर्खास्त गर्नुपर्ने माग गर्दै प्रदेश प्रमुख हरिशंकर मिश्रलाई पनि ज्ञापनपत्र बुझाएको थियो ।