काठमाडौं– चिकित्सा शिक्षा विधेयकमा असहमति राख्दै १६औँ अनशनमा रहेका डा. गोविन्द केसीको समर्थनमा नेपाली विवेकशील दलले प्रदर्शन गरेको छ । काठमाडौंको माइतीघर मण्डलामा सो दलले प्रदर्शन गरेको हो ।

सरकारका तर्फबाट शिक्षामन्त्री गिरिराजमणि पोख्रेलले संसद्मा प्रस्तुत गरेको सो विधेयक प्रतिपक्षी दल नेपाली कांग्रेसको अवरोधका बाबजुद शुक्रबार सत्तारुढ दलका सांसदको समर्थनमा शुक्रबार पारित भएको थियो ।

सो विधेयकको विरोधमा विवेकशील पार्टीले आयोजना गरेको प्रदर्शनमा सो पार्टीका संयोजक उज्ज्वल थापालगायत नेताहरूको सहभागिता छ । प्रदर्शनकारीले ‘सधैँ–सधैँ झुक्याउने, कहिलेसम्म हो लाज पचाउने ?’, ‘हिजोको सम्झौता कता गयो ? सरकारको नैतिकता कता गयो’लगायत नारासहितका प्लेकार्ड बोकेका थिए ।