इंग्लिस प्रिमियर लिगअन्तर्गत गएरातिको खेलमा टोटेनहम विजयी भएको छ । ऊ घरेलु टोली नटिङ्घम फरेस्टविरुद्ध २–० ले विजयी भएको हो ।

सिटी ग्राउन्डमा टोटेनहमलाई जित दिलाउन दुवै गोल ह्यारी केनले गरे । खेलको पाँचौं मिनेटमा केनले गोल गर्दै टोलीलाई अग्रता दिलाएका थिए ।

५६ औं मिनेटमा केन पेनाल्टीमा चुक्दा टोटेनहमले अग्रता दोब्बर बनाउने अवसर गुमायो । उनको प्रहारलाई फरेस्टका गोलरक्षक डिन हेण्डरसनले उत्कृष्ट बचाउ गरेका थिए ।

८१ औं मिनेटमा केनले व्यक्तिगत दोस्रो गोल गर्दै टोलीलाई २–० को जित दिलाए । यो जितसँग चार खेलमा १० अंक जोडेको टोटेनहम तेस्रो स्थानमा रहँदा पराजित फरेस्टसमान खेलबाट चार अंकका साथ १४ औं स्थानमा छ ।

लिगअन्तर्गतकै अन्य खेलमा वेस्टह्याम युनाइटेडले एस्टन भिल्लालाई १–० ले हराउँदा उल्भ्सले न्युकासल युनाइटेडसँग १–१ को बराबरी खेलेको छ ।