काठमाडौं– नेपाल सरकारले भनेजुएलामा देखिएको राजनीतिक समस्या बाह्य हस्तक्षेपविना समाधान हुनुपर्ने बताएको छ ।

मंगलबार विज्ञप्ति जारी गरी परराष्ट्र मन्त्रालयले ‘कुनै पनि देशको आन्तरिक राजनीतिक समस्या त्यही देशको संवैधानिक प्रावधानअनुसार प्रजातान्त्रिक माध्यम र बाह्य हस्तक्षेपविना समाधान हुनुपर्ने’ धारण सार्वजनिक गर्यो । 

भेनेजुएलामा भएको राजनीतिक घटनाक्रमलाई नजिकबाट निकालिरहेको भन्दै परराष्ट्रले यसमा निर्णय गर्ने जिम्मा भेनेजुएलाका नागरिककै भएको उल्लेख गरेको छ । परराष्ट्र मन्त्रालयको विज्ञप्तिमा भनिएको छ, ‘देशको राजनीतिक र संवैधानिक विषयमा अन्तिम निर्णय गर्ने अधिकार भेनेजुएलाका नागरिकसँगै छ ।’

केही दिनअघि नेपाल सत्तारुढ दल नेकपाका दुईमध्ये एक अध्यक्ष पुष्पकमल दाहाल ‘प्रचण्ड’ले भेनेजुएलामाथि अमेरिकाले हस्तक्षेप गरेको भन्दै विरोध जनाएपछि अमेरिकाले भेनेजुएलाको विषयमा नेपाल सरकारको आधिकारिक धारणा मागेको थियो ।