सत्तारुढ गठबन्धनको एक घटक जनता समाजवादी पार्टीका अध्यक्ष उपेन्द्र यादव सहभागी नभएपछि आगामि प्रदेश तथा प्रतिनिधि सभा निर्वाचनका लागि सिट बाँडफाँट गर्न बसेको गठबन्धनको बैठकमा औपचारिक छलफलसमेत हुन सकेन । आज साँझ बालुवाटारमा सुरु भएको यो बैठक भोलि बिहानसम्मका लागि स्थगित गरिएको छ ।

उता, शनिबार नै जनकपुरमा एक कार्यक्रममा सहभागी भएका यादवले आफूहरुले कुनै आत्मघाती निर्णय नगर्ने बरु गठबन्धनबाट बाहिरिएर चुनावमा जाने चेतावनी दिएका थिए । 

उनको पार्टीका नेताहरुले यादव बैठकमा आउने भने पनि विमानले समयमा उडान नभरेकाले आउन नसकेको बताएका छन् ।

तर, अर्कोतिर, उनको अनुपस्थितिलाई गठबन्धनमा पछिल्लो समय सिट बाँडफाँटमा देखिएको खटपटको कारण भएको अनुमान पनि गरिएको छ ।