निलम्बित प्रधानन्यायाधीश चोलेन्द्रशम्शेर जबराले केही राजनीतिक दलले अहिले न्यायपालिकालाई नै ध्वस्त पार्न खोजेको आरोप लगाएका छन् ।

महाअभियोग सिफारिस समितिमा बयान दिइरहेका जबराले राजनीतिक दलले न्यायापालिकालाई ध्वस्त पार्न खोजेको आरोप लगाएका हुन् । उनले आफूलाई अनावश्यक आरोप लगाइएको र आफूले न्यायापालिकामा आँच आउने कुनै काम नगरेको पनि दोहोर्याएका छन् ।

उनले आफूलाई यस्तो आरोप लगाउनु भनेको सम्पूर्ण न्याय प्रणालीलाई असफल बनाउन खोज्नु भएको पनि बताएका छन् । 

उनले भनेका छन्, ‘सबै न्यायाधीश विचौलिया हुन्, यिनीहरुले प्रधानन्यायाधीशको निर्देशनमा काम गर्छन् भनेर जतिबुँदामा आरोप लगाइएको छ, यसले त संविधानमा हामीले परिकल्पना गरेको स्वतन्त्र, सक्षम न्यायापालिकालाई टिकिखान नदिने, बसिखान नदिने र न्यायापालिकालाई ध्वंश गर्ने कामबाट यस्ता आरोप अघि बढेका छन् ।’

‘यो न्यायमा संलग्न व्यक्तिहरुको मात्र होइन, राजनीतिक दलहरुको पनि ध्येय हो । को राजनीतिक दल हो म भन्दिनँ, तर न्यायपालिकालाई ध्वंश गर्न सकियो भने आफ्नो स्वार्थपूर्ति हुन्छ भन्ने मनोभावना राखेर भइरहेको छ,’ उनले भनेका छन् ।