गत स्थानीय तह निर्वाचनमा महोत्तरीमा नेपाली कांग्रेसले टिकट नदिएपछि बागी उम्मेदवार दिएर बर्दिबास नगरपालिका प्रमुखमा जितेका प्रल्हाद क्षेत्री पक्षधरहरुले अहिले स्वतन्त्र पक्षधरको चुनावी छलफल थालेका छन् ।
महोत्तरी क्षेत्र न.१ क मा पर्ने बर्दिबास नगरपालिकामा स्वतन्त्र घोडा छापबाट जितेका क्षेत्री पक्षले आसन्न प्रतिनिधिसभा र प्रदेशसभा सदस्यको निर्वाचनमा कसरी सहभागी हुने भन्ने विषयमा छलफल थालेका हुन् ।
गत ३० वैशाखमा सम्पन्न स्थानीय तहको निर्वाचनमा पार्टी अनुशासन उल्लङ्घन गरेको आरोपमा कांग्रेसले नगर सभापति युवराज पोखरेल, प्रल्हाद क्षेत्रीसहितका नेतालाई कारबाही गरेको थियो ।
तर, अहिलेसम्म कारबाही फुकुवा नगरेपछि उनीहरूले आउँदो ४ मंसिरमा हुने प्रदेशसभा निर्वाचनमा समेत घोडा छापबाट नै आफ्नो उम्मेदवार बनाउने र प्रतिनिधिसभामा कुनै पाटीलाई सर्तसहित सहयोग गर्ने तयारी गरेका क्षेत्रीनिकट विनोद ढुंगेलले बताए ।
निर्वाचन क्षेत्र न. १ मा अहिले पनि आफूहरूको मत बढी रहेको स्वतन्त्र पक्षधरहरूले दाबी गरेका छन् । ‘हामी बैठक बसेर प्रदेशमा उम्मेदवार उठाउँछौ र संघमा परिस्थिति हेरेर सहयोग गर्छौँ,’ नेता ढुंगेलले भने ।
यद्यपि, कांग्रेसले कारबाही फुकुवा गरेमा भने पार्टीको निर्देशनमा लचिलो बन्ने क्षेत्री पक्षधरले संकेत गरेका छन । जिल्ला सभापति नागेश्वर यादवका अनुसार कारबाहीमा परेका नेता, कार्यकर्ताहरूलाई फुकुवा गर्न पहल भइरहेको छ ।
‘सभापति शेरबहादुर देउवासँग पनि कुरा भइसकेको छ । कारबाही फुकुवाका लागि सभापतिलाई पटक पटक भेटेको पनि छु । आशा गरौँ छिट्टै कारबाही फुकुवा हुनेछ,’ सभापति यादवले भने ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।