कैलालीको धनगढीबाट २० औँ पटक सत्याग्रह सुरु गरेका प्रा.डा. गोविन्द केसीसँग आज सरकारले वार्ता गर्दै छ । यसअघिका सहमति कार्यान्वयनसहितका सात बुँदे माग राखेर डा.केसीले गत सोमवारदेखि अनसन सुरु गरेका हुन् ।
डा.केसीसँग वार्ताका लागि सरकारले शुक्रबार नै वार्ताका लागि टोली गठन गरेको थियो । शनिबार वार्ताका लागि समय तोकिएको भए पनि शिक्षा सचिव सहभागी नहुने भए पनि आजका लागि वार्ताको समय तोकिएको डा.केसीका सहयोगी डा.अमृत जैसीले बताए ।
डा. जैसीले सरकार र अनसनरत डा.केसी पक्षबीच आइतबार बिहान वार्ताका लागि समय तोकिएको बताए । वार्ता शिक्षा, विज्ञान तथा प्रविधि मन्त्रालय सिंहदरबारमा बस्नेछ । सातौँ दिनसम्मको अनसनका कारण डा.केसीको स्वास्थ्य अवस्था भने बिग्रिन थालेको छ ।
स्वास्थ्यमा समस्या देखिएपछि धनगढीको श्रीकृष्ण मन्दिरको धर्मशालाबाट उपचारका लागि डा.केसीलाई सेती प्रादेशिक अस्पतालमा भर्ना गरिएको छ । स्वास्थ्यमा थप समस्या हुने देखिएपछि चिकित्सकले डा.केसीलाई औषधि प्रयोग गर्न सुझाव दिएका छन् ।
अनसनरत डाक्टर केसीको जीवन रक्षाको माग राख्दै आज पनि धनगढीमा उनका समर्थकहरूले प्रदर्शन गर्ने तयारीसमेत गरेका छन् ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, टिकटक, युट्युबमा पनि जोडिन सक्नुहुन्छ ।
