काठमाडौं– राष्ट्रिय सभा र प्रतिनिधि सभाबाट चिकित्सा शिक्षा विधेयक पारित भइसके पनि डा. गोविन्द केसीले अनसन जारी राखेका छन् । चिकित्सा शिक्षा सुधारको माग राख्दै १६ औँ पटक अनशन बसेका केसीको स्वास्थ्य अवस्था नाजुक बन्दै गएको छ । 

२४ दिनदेखि अनशनरत डा. केसीले गत साउनमा प्रधानमन्त्री केपी शर्मा ओलीसँगको सम्झौताअनुसार विधेयक तयार नभएको भन्दै अनसन जारी राखेका हुन् । लम्बिएको केसीको अनसनबारे अहिले सामाजिक संजालमा पनि चर्चा भइरहेको छ ।

डा. केसीको माग विपरित विधेयक पारित भएपछि अनसन अझै लम्बिने संकेत देखिएको छ । अनशन लम्बिएसँगै उनको स्वास्थ्यमा जोखिम देखिने चिन्ता व्यक्त गर्दै सामाजिक सञ्जालमा केसीले अनशन तोड्नुपर्ने सुझाव आएका छन् । 

अहिलेलाई स्वास्थ्य जोगाउन भएपनि अनशन तोडेर चिकित्सा क्षेत्र सुधारको लडाईं जारी राख्नुपर्ने भन्दै सामाजिक सञ्जालमा सुझाव आउन सुरु भएको छ ।

केसीले हारेको नठानी अनशन तोड्न आग्रह गर्दै डा. रामेश कोइराला ट्विटरमा लेख्छन् ‘डा. केसी, लगभग माथेमा आयोगअनुसारकै विधेयक राष्ट्रिय सभाबाट पनि पारित भयो । अन्य व्यापारीमैत्री संशोधनको सम्भावना अब रहेन । चि. शि आयोगमा असल उपाध्यक्ष भए त्यो ५ प्रतिशत छिद्रलाई पनि बन्द गर्न गर्न सक्छन् । तपाईको खबरदारी फेरी पनि चाहिन्छ । प्लिज हारेको नठानौं । जनताका कुरा पनि सुनौं, अनशन तोडौं ।’ 

डा. केसी, लगभग माथेमा आयोगअनुसारकै विधेयक राष्ट्रिय सभाबाट पनि पारित भयो। अन्य व्यापारीमैत्रि संशोधनको संभावना अब रहेन। चि.शि. आयोगमा असल उपाध्यक्ष भए त्यो ५% छिद्रलाई पनि बन्द गर्न सक्छन्। तपाईँको खबरदारी फेरि पनि चाहिन्छ। प्लिज, हारेको नठानौँ! जनताका कुरा पनि सुनौँ! अनशन तोडौँ!

— रामेश (@RaameshKoirala) January 31, 2019

नयाँ शक्ति पार्टीका संयोजक तथा पूर्वप्रधानमन्त्री डा. बाबुराम भट्टराइले पनि डा. केसीलाई अनशन तोड्न सुझाव दिएका छन् । अनशन तोडेर सत्तालाई नैतिकताको पाठ सिकाउनुपर्ने भन्दै भट्टराईले ट्विटरमा लेखेका छन्, ‘सत्यको आग्रह गर्दै आफ्नो ज्यान जोखिममा राख्नसक्नु मानवीय गुणको उच्चतम विन्दु हो, जुन डा. केसीले प्राप्त गरिसक्नु भएको छ । समाज रुपान्तरणको बाँकी कामका निम्ति उहाँ बाँच्न आवश्यक छ । मूर्खदेखि दैव डरा भन्ने लोकोक्ति छ । डा. केसीले अनसन तोडेर मूर्ख सत्तालाई अर्को नौतिक झापड हाने कसो होला !’

सत्यको आग्रह गर्दै आफ्नो ज्यान जोखिममा राख्नसक्नु मानवीय गुणको उच्चतम विन्दू हो, जुन डा के सी ले प्राप्त गरिसक्नुभएको छ!समाज रूपान्तरणको बाँकी कामनिम्ति वहाँ बाँच्नु आवश्यक छ!मूर्खदेखि दैव डरा भन्ने लोकोक्ति छ!डा के सी ले अनसन तोडेर मूर्ख सत्तालाई अर्को नैतिक झापड हाने कसो होला?

— Baburam Bhattarai (@brb1954) February 1, 2019

डा. रविन्द्र समीरले पनि केसीको विग्रदो स्वास्थ्य अवस्थाप्रति चिन्ता व्यक्त गर्दै केसीको जीवनरक्षा माग गरेका छन् । दुई पाइला अघि बढ्न एक पाइला पछि हट्नुपर्ने तर्क दिदै टिव्टरमा उनी लेख्छन, ‘यो विधेयक पास हुनुमा डा. केसीको ठूलो योगदान छ । यो उपलब्धि कार्यान्वयन गराउन तथा बाँकी मागको लागि समेत डा.केसीको आवश्यकता छ । तसर्थ उहाँलाई बचाउन सबै लागौं ।’ 

यो बिधेयक पास हुनुमा डा. केसीको ठूलो योगदान छ। यो उपलब्धि कार्यान्वयन गराउन तथा बॉकी मागको लागि समेत डा. केसीको आवश्यकता छ। तसर्थ उहॉलाई बचाउन सबै लागौं। २ पाइला अघिं बढ्न १ पाइला पछि हट्दा हार हुंदैन। जतिसक्दो छिटो अनसन तोड्न डा. केसीलाई कन्भिन्स गरौं। #SaveDrKc

— Rabindra Sameer (@Sameer_Rabindra) January 31, 2019

लेखक नयनराज पाण्डे शिक्षाविद केदारभक्त माथेमाले नै डा. केसीलाई सम्झाउँदा उपयुक्त हुने धारणा राखेका छन् । पाण्डेले पनि टिव्टरमा लेखेका छन, ‘अब माथेमा सर गएरै डा.केसीलाई सम्झाउँदा ठीक हुन्थ्यो कि ।’

अब माथेमा सर गएरै डा.केसीलाई सम्झाउँदा ठीक हुन्थ्यो कि !#सानोविचार #SaveDrKC

— NAYAN RAJ PANDEY (@NayanRajPandey) January 31, 2019