आगामी मंसिर ४ गते हुने प्रतिनिधिसभा निर्वाचनमा उम्मेदवार बनेका धनुषाका केही ‘हेबिवेट’ उम्मेदवारहरुले आफैँलाई भोट हाल्न नपाउने भएका छन् । 

मतदाता नामावली भएको क्षेत्रभन्दा बाहिर उम्मेदवार बन्दा उनीहरुले भोट हाल्न नपाउने निर्वाचन आयोगले जनाएको छ । उनीहरुले प्रत्यक्षमा मात्र नभइ समानुपातिकमा समेत मतदान गर्न नपाउने भएका छन् । 

धनुषाको निर्वाचन क्षेत्र नम्बर–३ मा दुई पूर्वमन्त्रीसहित ३१ जना चुनावी मैदानमा रहेपनि मुख्य प्रतिस्पर्धीलेनै आफैंलाई मतदान गर्न पाउने छैनन् । 

नेकपा एमालेबाट उम्मेदवार रहेकी पूर्वमन्त्री जुलीकुमारी महतो र लोकतान्त्रिक समाजवादी पार्टीबाट सत्ता गठबन्धनका उम्मेदवार अनिलकुमार झाले आफैंलाई मतदान गर्नबाट वञ्चित हुने भएका छन् ।

प्रतिनिधिसभा सदस्य पदकी उम्मेदवार महतो धनुषा क्षेत्र नम्बर–४ को भोटर हुन् । तर, उम्मेदवारी धनुषा–३ बाट दिएकी छन् । त्यस्तै, झा पनि रौतहट क्षेत्र नम्बर–१ का मतदाता हुन् । तर, उनको उम्मेदवारी धनुषा–३ बाट परेको छ । 

धनुषा–३ मा राष्ट्रिय राजनीतिका दुई ‘हेबिवेट’ उम्मेदवारबीच प्रतिस्पर्धा हुनेछ । जुलीसँग लोसपा नेता अनिल झा चुनावमा उठ्ेका छन् । जुलीलाई एमाले र जसपाको समर्थन छ भने अर्का नेता अनिललाई सत्ता गठबन्धनको समर्थन छ । 

मतदाता नामावली भएका क्षेत्रभन्दा फरक ठाउँमा मत दिन नपाउने व्यवस्थाअनुसार उनीहरु दुबैजनाले आफैँलाई मत हाल्न नपाउने भएका हुन् ।