राष्ट्रपति विद्यादेवी भण्डारीले दीपावलीको प्रकाशले सबैलाई सत्य र न्यायको मार्गमा अग्रसर रहन पथ प्रदर्शन गर्न सकोस् भन्‍ने कामना गरेकी छन् । तिहारको अवसरमा शुभकामना दिँदै उनले देशविदेशमा रहेका नेपालीमा सुख, शान्ति, समृद्धि र उत्तरोत्तर प्रगतिको कामना गरेकी हुन् ।

‘तिहार पर्वले एकातिर प्रकृति मानव र प्राणी जगतको अन्योन्याश्रित सम्बन्धलाई सजीव रूपमा चित्रण गर्छ भने अर्कातिर दाजुभाइ तथा दिदीबहिनी बीचको पवित्र र आत्मीय सम्बन्धलाई प्रगाढ बनाउँछ’, राष्ट्रपति भण्डारीले सन्देशमा उल्लेख गरेकी छन्, ‘तिहारको अवसरमा खेलिने देउसी–भैलोको दक्षिणाबाट संकलित कोषलाई सामाजिक र सामुदायिक हितका कार्यमा लगाउने असल परम्परा समेत रहेको छ ।’

उनले यस प्रकारका असल परम्परा र अभ्यासलाई जोगाउनुपर्ने पनि बताएकी छन् ।