रुसको कोस्ट्रोमा सहरको एक बारमा आगलागी हुँदा १३ जनाभन्दा बढीको मृत्यु भएको छ । अहिलेसम्म २५० जनालाई सकुशल बाहिर निकालिएको छ ।

एकजना रक्सीले मातिएका ग्राहकले डान्स फ्लोरमा फ्लेयर गन चलाउँदा आगो सुरु भएको रुसी सञ्चारमाध्यमले अधिकारीहरूलाई उद्धृत गर्दै बताएको छ। प्रहरीले यस घटनामा संलग्न एक जनालाई पक्राउ गरेको छ ।

आगो छतको बत्तिको केही भागहरूमा फैलिएपछि कोठा तुरुन्तै धुँवाले भरिएको र यसलाई निभाउन केही घण्टा लागेको बताइएको छ । बिबिसीका अनुसार क्लबमा कतिजना उपस्थित थिए भन्ने आधिकारिक जानकारी आउन सकेको छैन । 

क्लबको व्यवस्थापन गर्ने कम्पनीका निर्देशक पनि पक्राउ परेका छन् । कम्पनीका निर्देशक स्थानीय राजनीतिज्ञ हुन् ।