सत्तारुढ गठबन्धनबाट धनुषा निर्वाचन क्षेत्र नम्बर–३ मा प्रतिनिधिसभा सदस्य पदका उम्मेदवार अनिलकुमार झाले नागरिकता सम्पूर्ण देशवासीको हक रहेको बताएका छन् ।
सत्ता गठबन्धनले सोमबार जनकपुरधाममा आयोजना गरेको चुनावी सभालाई सम्बोधन गर्दै झाले नागरिकताबाट वञ्चित भई पीडा भोगिरहेका व्यक्तिहरुको कुरा सुनेर आफू धेरै दुःखी भएको बताएका हुन् ।
झाले आफू नागरिकताविहीनहरुको आवाजको रुपमा धनुषा–३ मा प्रस्तुत भएको बताए । उनले नागरिकता र पहिचानको विषयमा आफ्नो ३० वर्षे संघर्षमा सम्पूर्ण जनताको सहभागिताका लागि आशा राखेकोसमेत बताए ।
मंसिर ४ गते हुने निर्वाचनमा सत्तारुढ गठबन्धनका उम्मेदवारलाई जिताएर यस अभियानमा सहभागी हुन उनले अपिल गरेका छन् ।
सभामा बोल्दै सत्तारुढ गठबन्धनबाट धनुषाको ३(ख)को प्रदेशसभा सदस्य पदका उम्मेदवार परमेश्वर साहले जनकपुरधामलाई राजधानी बनाउन मुख्यमन्त्री लालबाबु राउतले बार्गेनिङ गरेको आरोप लगाए ।
पहिलोपटक नाम र राजधानीका प्रस्ताव फेल हुँदा प्रदेशसभामा फेरि दोस्रोपटक प्रस्ताव गरिएको र सो प्रस्तावको पक्षमा दुईतिहाइ बहुमत पुर्याउनका लागि राउतले बार्गेनिङ गरेको उनले बताए ।
उनले भने, ‘जनकपुरधामलाई राजधानी बनाउन जनकपुरधाम विकास प्राधिकरण मात्रै नभई वीरगञ्ज विकास प्राधिकरण समेत हुनुपर्ने सर्त मुख्यमन्त्री राउतले राखेका थिए । जनकपुरधाम र वीरगञ्ज दुवै यसै प्रदेशमा रहेकाले हामी दुवैलाई विकास प्राधिकरण गठन गरेर जनकपुरधामलाई राजधानी बनाउन सफल भयौँ ।’
साहले मुलुकमा संघीयता र लोकतन्त्र जोगाउनका लागि सत्ता गठबन्धनको पक्षमा मतदान गर्न अपिल गरे । उनले जनकपुरधामका जनता न्यायप्रेमी, लोकतन्त्र प्रेमी र क्रान्तिकारी रहेकाले यहाँका मतदाता सत्ता गठबन्धनकै पक्षमा मतदान गर्ने विश्वास व्यक्त गरे ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
