केही महिना यता घट्दै गएको कोरोनाभाइरस संक्रमण फेरि बढ्न थालेको छ । कोरोनाभाइरसको उत्पत्ति भएको मानिएको चीनमा फेरि कोरोना संक्रमित बढ्न थालेका छन् ।

चीनमा जिरो कोभिड पोलिसी हटाए पछि त्यहाँ कोरोनाभाइरस संक्रमितको संख्या ह्वात्तै बढेको हो । 

चीनको स्वास्थ्य मन्त्रालयका अनुसार ८ डिसेम्बरदेखि १२ जनवरीसम्म ६० हजार मानिसको कोरोनाभाइरसका कारण मृत्यु भएको छ । यीमध्ये अधिकांशको उमेर ६५ वर्षभन्दा माथि रहेको जनाइएको छ ।

आजसम्म चीनमा ९० करोड मानिसमा कोरोनाभाइरस संक्रमण भएको बताइएको छ ।

चीनमा कोरोनाभाइरस संक्रमित बढ्न थालेपछि छिमेकी देश भारतमा पनि कोरोनाभाइरस संक्रमण बढ्न थालेको छ । भारतमा शुक्रबार मात्र १ सय ९० जनामा कोरोनाभाइरस संक्रमण भएको बताइएको छ । भारतमा अहिलेसम्म कोरोनाका कारण ५ लाखभन्दा धेरैको मृत्यु भएको छ ।