नेपाली कांग्रेसले चितवन–२ मा हुन गइरहेको उपनिर्वाचनमा उम्मेदवारको नाम सिफारिस गर्न सबन्धित कमिटीलाई निर्देशन दिएको छ । 

बुधबार बसेको कांग्रेस कार्यसम्पादन समितिको बैठकले सो निर्णय गर्दै चितवन जिल्ला समितिलाई उम्मेदवार सिफारिस गर्न निर्देशन दिएको प्रवक्ता प्रकाशशरण महतले जानकारी दिए । 

आगामी वैशाख १० गते हुने उक्त उपनिर्वाचनका लागि पार्टी विधानको धारा ३२ (८) बमोजिम क, ख, ग बमोजिम प्रक्रिया पुर्‍याई ​उम्मेदवारको नाम प्रस्ताव र सिफारिस गर्न पार्टीका सम्बन्धित निकायलाई निर्देशन दिइएको हो । 

राष्ट्रिय स्वतन्त्र पार्टी सभापति रवि लामिछानेको सांसद पद सर्वोच्च अदालतको फैसालापछि खारेज भएको चितवन–२ को उपनिर्वाचन आगमी वैशाख १० गते गर्ने निर्वाचन आयोगले निर्णय गरिसकेको छ ।