साफ यू–१७ महिला च्याम्पियनसिपमा नेपाल रुससँग ३–० ले पराजित भएको छ । प्रतियोगितामा नेपालको यो दोस्रो हार हो । 

यसअघि नेपालले आफ्नो पहिलो खेलमा भारतविरुद्ध ४–१ को हार बेहोरेको थियो । यता, रुसको भने यो लगातार तेस्रो जित हो । रुसले यसअघि बंगलादेशलाई ३–० ले र भुटानलाई ९–० ले पराजित गरेको थियो ।

आइतबार बंगलादेशको ढाकामा सम्पन्न खेलमा रुसलाई जित दिलाउन एलिना गोलिकले दुई र पोलिना फिल्सिनाले एक गोल गरे ।

खेलको ६३औँ मिनेटसम्म नेपालले रुसलाई गोलरहित बराबरीमा रोकेको थियो । तर, ६४औँ मिनेटमा गोलिकले नेपालको रक्षापंक्ति तोड्दै रुसलाई अग्रता दिलाइन् । ७४औँ मिनेटमा गोलिकले नै रुसको अग्रता दोब्बर पारिन् । यस्तै, ८४औँ मिनेटमा फिल्सिनाले गोल गर्दै रुसलाई ३–० को सहज अवस्थामा पुर्‍याइन् । 

जितसँगै तीन खेलबाट नौ अंक जोडेको रुस तालिकाको शीर्ष स्थानमा छ । समान खेलबाट तीन अंक जोडेको नेपाल तालिकाको चौथो स्थानमा छ ।