एजेन्सी– भारतले नागपुरमा भएको अष्ट्रेलियासँगको दोस्रो एक दिवशीय रोमान्चक खेलमा आठ रनले जित दर्ज गरेको छ । यो जितसँगै भारत पाँच दिने वानडे सिरिजमा २—० ले अगाडि भएका छ । 

मंगलबार भएको खेलमा अष्ट्रेलियालाई अन्तिम ओभरमा जितका लागि ११ रन चाहिएको थियो । क्रिजमा लियोन र मार्कस स्टोइनिस थिए । मार्कस ओभरको पहिलो बलमा नै एलबिडब्लू भएर आउट भए । यो निर्णयमा अष्ट्रेलियाले रिभ्यू पनि लिएको थियो । तर, नतिजा उसको पक्षमा आएन । 

त्यही अन्तिम ओभरको तेस्रो बलमा पनि विजय शंकरले अर्को विकेट लिए । अष्ट्रेलियाको पूरै ब्याट्सम्यान ४९.३ ओभरमा २४२ रनको योगफल जोडेर आउट भयो । खेलमा अष्ट्रेलियाको तर्फबाट स्टोइनिसले मात्र ५० रन कटाए । 

भारतको तर्फबाट कुलदिप यादवले सबैभन्दा धेरै ३ विकेट लिए । भारतले टस हारेर पहिले ब्याटिङ गर्दै २५० रन जोडेको थियो । 

खेलमा भारतीय कप्तान विराट कोहलीले १२० बल खेल्दै ११६ रन बनाए । अरु कुनै पनि भारतीय ब्याट्सम्यानले ५० रन कटाउन सकेनन् ।