न्यायपरिषदले विनोद शर्मा पौडेललाई सर्वोच्च अदालतको न्यायाधीशमा सिफारिस गरेको छ । आइतबार बसेको न्यायपरिषद बैठकले उनलाई न्यायाधीशमा सिफारिस गरेको हो । 

गत वर्ष भदौमा पनि उनको नाम सिफारिस भएको थियो । त्यतिबेला संसदीय सुनुवाइ हुन नसकेका कारण उनको न्यायाधीश नियुक्ति प्रक्रिया अघि बढेको थिएन । 

सिफारिस हुनुअघि उनी उच्च अदालत जनकपुरका कामु मुख्य न्यायाधीश थिए । अब उनको नाम संसदीय सुनुवाइ समितिमा पठाइने न्यायपरिषदका प्रवक्ता मानबहादुर कार्कीले जानकारी दिए ।

गत वर्ष सर्वोच्च अदालतमा सिफारिस भएदेखि नै शर्मा सर्वोच्च अदालतमै काजमा छन् । उनको सिफारिसबारे निर्णय हुन नसकेपछि पुराना मुद्दाको टुंग्याउने काममा संलग्न थिए ।