नेपाल प्रहरीको केन्द्रीय अनुसन्धान ब्युरो (सिआइबी)ले हङकङबाट ल्याइएको झण्डै ६१ किलो सुन तस्करी प्रकरणबारेको प्रतिवेदन बुधबार जिल्ला सरकारी वकिल कार्यालयमा बुझाउने भएको छ । लामो समयको अनुसन्धान सकेर सिआइबीले सो बहुचर्चित सुन प्रकरणको प्रतिवेदन तयार गरेको हो ।
हङकङबाट ब्रेक सुमा हालेर ल्याइएको उक्त सुन गत साउन ३ गते राजस्व अनुसन्धान विभागको टोलीले सिनामंगलस्थित भन्सार कार्यालयअगाडिबाट बरामद गरेको थियो ।विभागले आवश्यक अनुसन्धान सकेपछि १८ दिनपछि सुन प्रकरणको अनुसन्धानको जिम्मा प्रहरीको केन्द्रीय अनुसन्धान ब्युरो (सिआइबी)लाई दिएको थियो ।
ब्रेक सुसहितको सुन एक सय ५५ किलो भएको पाइए पनि गाल्दा ६० किलो सात सय १६ ग्राम फेला परेको थियो । सिआइबीका प्रमुख, प्रहरी अतिरिक्त महानिरीक्षक किरण बज्राचार्यका अनुसार अनुसन्धान प्रतिवेदन लेखन कार्य आज साँझ सकिएको छ ।
सो प्रतिवेदन रायसहित भोलि सरकारी वकिलमा बुझाउने तय भएको उनले जानकारी दिइन् । आरोपीविरुद्ध संगठित अपराध, सुन चोरी पैठारी र राष्ट्र बैंक ऐनअन्तर्गत कसुरमा मुद्दा चलाउने राय दिने सिआइबीको तयारी छ ।
सुन अनुसन्धान सुरु भएको यही ३१ गते ६० दिन पुग्छ । ६० दिनभित्र मुद्दा अदालतमा पुर्याइसक्नुपर्ने भएकाले भोलि प्रतिवेदन बुझाउने मिति तय गरिएको हो । सरकारी वकिल कार्यालयले तीन दिन मिसिल अध्ययन गरेर मुद्दा अदालतमा पुर्याउँछ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।