जेलमा रहेकी नोबेल शान्ति पुरस्कार विजेता तथा महिला अधिकारकर्मी नर्गिस मोहम्मदीले तेहरानस्थित आफ्नो जेलको कोठाबाट गोप्य रूपमा आफन्तमार्फत विश्वसामु पठाएको सन्देशमा विजय कठिन तर निश्चित रहेको बताएकी छन् । 

मंगलबार प्रकाशित भएको उनको सन्देशमा भनिएको छ–विजय सजिलो छैन, तर यो निश्चित छ ।

उनकी छोरी कियाना रहमानीले फ्रान्सेली भाषामा पढेर सुनाएको र नोबेल पुरस्कार समितिको आधिकारिक वेबसाइटमा पोस्ट गरिएको सन्देशमा ५१ वर्षीया सामाजिक अभियन्ता तथा पत्रकार मोहम्मदीले नर्वेली नोबेल समितिप्रति ‘हार्दिक कृतज्ञता’ व्यक्त गरेकी छिन् । 

‘इरानमा महिलामाथि भइरहेको उत्पीडनविरुद्ध लडेको’ भन्दै उक्त पुरस्कारका लागि छानिएकी मोहम्मदीले इरानमा महिलाले हिजाब लगाउनुपर्ने प्रावधानको फेरि एकपटक आलोचना गर्दै सन्देशमा इरानी अधिकारीको निन्दा गरेकी छन् । उनले आफ्नो परिवारसहित फ्रान्समा शरण लिएकी १७ वर्षीया छोरीमार्फत सो सन्देश सम्प्रेषण गरेकी हुन् । 

उनले भनेकी छन्, ‘अनिवार्य हिजाब समाजमाथि थोपरिएको नियन्त्रण र दमनको साधन हो र यसमा यो इस्लामिक अधिनायकवादी धार्मिक शासनको निरन्तरता र अस्तित्व निर्भर गर्दछ ।’

४५ वर्षदेखि इरानी समाजमा अभाव र गरिबीलाई संस्थागत गर्ने शासनको निन्दा गर्दै उनले ‘यो झूट, छल, धूर्तता र धम्कीमा आधारित’ भएको बताएकी छन् । 

दर्जनौँपटक पक्राउ परी पाँचपटकसम्म जेल सजाय पाएकी र सन् २०२१ देखि पुनः इरानी जेलमा परेकी मोहम्मदी इरानमा ‘महिलाहरूको स्वतन्त्र जिउन पाउनुपर्ने’ विद्रोहको नेतृत्व गर्ने साहसी केही इरानी महिलामध्ये एक हुन् ।