लन्डन– बेलायती प्रधानमन्त्री टेरेसा मेले युरोपियन युनियनबाट बहिर्गमन (ब्रेक्जिट) को मिति ३० जुनसम्म धकेल्न अनुरोध गर्दै युरोपियन युनियनलाई चिठी लेखेकी छिन् । 

बुधबार संसद्को नियमित साप्ताहिक सवाल–जवाफमा प्रधानमन्त्री मेले आफूले इयु काउन्सिलका प्रेसिडेन्ट डोनल्ड टस्कलाई पत्र पठाएको खुलासा गरिन् । 

संसद्को तल्लो सदन हाउस अफ कमन्सका सांसदहरुलाई संबोधन गर्दै प्रधानमन्त्री मेले यो प्रस्ताव इयुले स्वीकार गरे आफूले संसद्मा ब्रेक्जिट सम्झौताबारे तेस्रो मतदानको तयारी गर्ने बताइन् । 

यसअघि, प्रधानमन्त्री मेले तयार पारेको ब्रेक्जिट सम्झौताको प्रस्ताव दुईपटक संसद्बाट अस्वीकृत भइसकेको छ । 

छोटो समय बढाउनका लागि प्रस्ताव गरेकोबारे प्रकाश पार्दै प्रधानमन्त्री मेले ब्रेक्जिट लामो समय लम्ब्याउनेमा कसैको इच्छा रहन्छ भन्ने आफूलाई विश्वास नरहेको बताइन् । किनकि, अझै लामो समय इयुमा रहनुको अर्थ यसै वर्ष हुन लागेको इयुको निर्वाचनमा बेलायत सहभागी हुनु हो । 

ब्रेक्जिटलाई ३० जुनभन्दा पर धकेल्न आफूले कुनै तयारी नगरेको उनले खुलाइन् । 

सन् २०१६ मा भएको ब्रेक्जिटसम्बन्धी जनमत संग्रहमा बेलायती जनताले इयुबाट अलग हुने पक्षमा मतदान गरेका थिए । ब्रेक्जिटको मिति मार्च २९ लाई तोकिएको थियो । 

ब्रेक्जिटको मिति ३० जुनलाई सार्न इयुका सबै २७ सदस्य राष्ट्रको सहमति चाहिन्छ । यसका लागि इयु सदस्य राष्ट्रका नेताहरुलाई भेट्न प्रधानमन्त्री मे भोलि ब्रसेल्स जाँदै छिन् ।

हाउस अफ कमन्सका विपक्षी सांसद्हरुले प्रधानमन्त्री मेमाथि देशलाई संकटतर्फ धकेलेको आरोप लगाएका छन् । बेलायती संसद् विनासम्झौता इयुबाट अलग हुन नहुने पक्षमा छ, र प्रधानमन्त्री मेको सम्झौता प्रस्ताव पनि स्विकारिरहेको छैन । यसले प्रधानमन्त्री मेको मुस्किल बढाइरहेको छ ।