काठमाडौंमा जारी नेपाल सुपर लिग (एनएसएल) मा आज एफसी चितवन र काठमाडौं रेजर्स खेल्दै छन् । यी दुई टिमबीचको खेल साँझ साढे ५ बजे त्रिपुरेश्वरस्थित दशरथ रंगशालामा सुरु हुनेछ । 

साबिक विजेता काठमाडौंले पहिलो खेलमा स्पोर्टिङ इलामलाई १–० ले हराउँदै प्रतियोगितामा विजयी सुरुवात गरेको थियो । चितवन भने पहिलो खेल पोखरा थन्डर्ससँग पराजित भयो । अहिले काठमाडौंसँग ३ अंक छ । चितवन भने अंकविहीन छ । 

काठमाडौं दोस्रो संस्करणमा पनि बलियो देखिएको छ । पहिलो खेलमा इलामलाई हराएर काठमाडौंले आफूलाई अब्बल साबित गरिसकेको छ ।

चितवनले पहिलो खेलमा टिमअनुसारको प्रर्दशन देखाउन सकेन । चितवनमा विमल घर्तीमगर, नवयुग श्रेष्ठ, विशाल श्रेष्ठलगायत स्टार खेलाडी छन् ।